حکومت سازی: ق لیگ کا پنجاب میں بڑا عہدہ لینے کا فیصلہ

ملک میں عام انتخابات کے بعد سیاسی جماعتوں کے درمیان وفاق اور صوبائی سطحوں پر حکومت سازی سے متعلق مشاورت جاری ہے۔ اسی حوالے سے پاکستان مسلم لیگ ق بھی غور و فکر میں مصروف ہے۔

ق لیگ کے ذرائع کے مطابق ق لیگ نے پنجاب میں پاکستان مسلم لیگ ن سے ایک بڑا عہدہ لینے کا فیصلہ کیا ہے۔ اس فیصلے کے مطابق، ق لیگ پاکستان مسلم لیگ ن سے پنجاب اسمبلی کی اسپیکر شپ کا مطالبہ کرے گی۔

ذرائع کا کہنا ہے کہ اگر ن لیگ اسپیکر شپ دینے پر تیار نہ ہوئی تو ق لیگ کی جانب سے اہم وزارت کا مطالبہ کیا جائے گا، ق لیگ کی جانب سے  پنجاب اسمبلی کے اسپیکر اور وزارت کے امیدوار چوہدری شافع حسین ہوں گے۔

ذرائع نے مزید بتایا کہ ق لیگ ڈپٹی اسپیکر کی سیٹ پر بھی معاملات طے کر سکتی ہے۔ ق لیگ ذرائع نے کہا ہے کہ پنجاب میں ان کی جماعت حکومت سازی میں ن لیگ کی حمایت کرے گی۔

واضح رہے کہ نامزد وزیراعلیٰ پنجاب مریم نواز کی جانب سے ان دنوں صوبائی کابینہ بنانے کے لیے مختلف ناموں پر غور کیا جا رہا ہے۔ اس حوالے سے پنجاب کے مختلف ڈویژنز اور اضلاع سے صوبائی وزرا لیے جانے کا امکان ہے۔

صوبہ پنجاب کے لیے کابینہ کی تشکیل میں ابتدائی طور پر 25 سے 30 اراکان شامل کیے جائیں گے۔