گزشتہ ہفتے کے آخر میں ملک کے بیشتر حصوں میں بارشوں اور بالائی علاقوں میں بارشوں کے ساتھ برفباری کا سلسلہ شروع ہوا تھا جو رواں ہفتے بھی جاری رہا۔
بارشوں اور برفباری کا یہ سلسلہ ابھی رکا ہی تھا کہ رواں ہفتے سے ملک میں بارشوں اور برفباری کی پھر سے پیش گوئی کی جا چکی ہے۔
موسمیاتی تجزیہ کار اویس حیدر کے مطابق، ملک بھر میں رواں ہفتے کے آخر سے ایک اور طاقتور مغربی ہواؤں کا سلسلہ داخل ہونے کا امکان ہے، 25 سے 27 فروری تک شمالی اور جنوبی بلوچستان کے مختلف علاقوں میں کہیں ہلکی اور کہیں تیز بارش یا ژالہ باری کے امکانات ہیں۔
مزید پڑھیں
اویس حیدر کا کہنا ہے کہ اس دوران کراچی سمیت صوبہ سندھ کے مختلف علاقوں میں بھی گرج چمک کے ساتھ کہیں ہلکی اور کہیں تیز بارش کا امکان ظاہر کیا گیا ہے۔ انہوں نے مزید بتایا کہ بارشوں کا نیا سلسلہ پنجاب کے مغربی اور بالائی علاقوں کو بھی متاثر کرے گا جبکہ بالائی علاقوں میں یہ مزید بارشوں اور برف باری کا سبب بنے گا۔
محکمہ موسمیات نے بھی رواں ہفتے کے دوران بارشوں کا امکان ظاہر کر دیا ہے اور کہا ہے کہ بارش کے بعد موسم مزید نکھرے جائے گا اور سردی میں بھی کمی واقع ہوگی۔
محکمہ موسمیات کے مطابق، رواں ہفتے ملک کے بالائی علاقوں، خیبر پختونخوا، گلگت بلتستان، کشمیر اور ملحقہ پہاڑی علاقوں میں چند مقامات پر تیز ہواؤں اور گرج چمک کے ساتھ ہلکی بارش اور پہاڑوں پر ہلکی برف باری کا بھی امکان ہے۔
گزشتہ 24 گھنٹے کے دوران بھی ملک کے بیشتر علاقوں میں موسم سرد اور خشک جبکہ بالائی علاقوں میں شدید سرد رہا تاہم بالائی خیبر پختونخوا، کشمیر اور ملحقہ پہاڑی علاقوں میں چند مقامات پر بارش اور پہاڑوں پر برف باری ہوئی۔
