محکمہ موسمیات کی جانب سے خیبر پختونخوا میں بارشوں،تیز ہواؤں اور بالائی اضلاع میں برفباری کا ایک اور سلسلہ 25 فروری سے شروع ہونے کی پیشگوئی کے پیش نظر پراونشل ڈیزاسٹر مینجمنٹ اتھارٹی (پی ڈی ایم اے) نے تمام ضلعی انتظامیہ کو الرٹ رہنے کےلیے مراسلہ جاری کردیا۔
پی ڈی ایم اے خیبر پختونخوا کے ڈائریکٹر جنرل محمد قیصر خان کی جانب سے جاری مراسلے میں بارشوں اور برفباری کے پیش نظر ضلعی انتظامیہ کو پیشگی اقدامات کرنے کی ہدایت کی گئی ہے۔ مراسلے کے مطابق برفباری اور بارشوں سے بالائی اضلاع میں لینڈ سلائیڈنگ کا خدشہ ہے۔ اس کے پیش نظر ضلعی انتظامیہ کو چھوٹی بھاری مشینری کی دستیابی یقینی بنانے کی ہدایت کی گئی ہے۔
سیاحوں کو موسمی حالات سے باخبر رہنے کا مشورہ
پی ڈی ایم اے نے طوفان کی صورت میں عوام کو بجلی کی تاروں، بوسیدہ عمارتوں و تعمیرات، سائن بورڈز اور بل بورڈز سے دور رہنے کی ہدایت کی ہے. مراسلے میں حساس بالائی علاقوں میں سیاحوں اور مقامی آبادی کو موسمی حالات سے باخبر رہنے اور احتیاطی تدابیر اختیار کرنے کی ہدایت کی گئی ہے.
بارشوں اور برفباری کا سلسلہ 27 فروری تک جاری رہنے کا امکان
پی ڈی ایم اے نے ہدایت کی ہے کہ حساس اضلاع میں ضلعی انتظامیہ مقامی آبادی تک پیغامات مقامی زبانوں میں پہنچائے، کسی بھی ہنگامی صورتحال میں تمام متعلقہ ادارے سڑکوں کی بحالی کے لیے چوکس رہیں اور سڑکوں کی بندش کی صورت میں ٹریفک کے لیے متبادل راستے فراہم کیے جائیں اور حساس علاقوں میں صوبائی اور قومی شاہراہوں پر مسافروں کو پیشگی خبردار کیا جائے۔
اضلعی انتظامیہ کو ہنگامی خدمات کے اہلکاروں کی دستیابی کو یقینی بنانے اور سیاحوں کو موسمی صورت حال سے آگاہ کرنے کی بھی ہدایت کی گئی۔
مراسلے کے مطابق بارشوں اور برفباری کا سلسلہ 27 فروری تک وقفے وقفے سے جاری رہنے کا امکان ہے لہٰذا سیاح دوران سفر خصوصی احتیاطی تدابیر اختیار کریں۔
