تحریک انصاف کی جانب سے خیبرپختونخوا اسمبلی کے ڈپٹی اسپیکر کے عہدے کے لیے ثریا بی بی کے نام کی باضابطہ طور پر توثیق کردی گئی ہے، جو خطے کے سیاسی منظر نامے میں ایک تاریخی پیش رفت کا تسلسل سمجھا جارہا ہے۔
مزید پڑھیں
سوشیالوجی میں ماسٹرز ڈگری حاصل کرنیوالی ثریا بی بی کی ڈپٹی اسپیکر کے عہدے کے لیے نامزدگی تحریک انصاف کی موجودہ سینیٹر مہر تاج روغانی کے نقش قدم پر ہے، جو اس سے قبل خیبرپختونخوا اسمبلی میں ڈپٹی اسپیکر کے عہدے پر فائز رہ چکی ہیں۔
پاکستان تحریک انصاف (پی ٹی آئی) کے باوثوق ذرائع کے مطابق پارٹی قیادت نے ڈپٹی اسپیکر کے عہدے پر ایک خاتون کو شامل کرنے کی وکالت کی جس کے نتیجہ میں ثریا بی بی اس عہدے کے لیے سب سے اہم شمار کی گئی ہیں۔
حلقہ کے پی 1 چترال سے تعلق رکھنے والی ثریا بی بی نے عام انتخابات میں کے پی ون اپر چترال میں غیر معمولیکامیابی حاصل کی تھی، وہ تحریک انصاف کے ملاکنڈ خواتین ونگ کی نائب صدر کی حیثیت میں سیاسی طور پر متحرک ہیں اور کمیونٹی میں اپنے سماجی کاموں کے لیے مشہور ہیں۔
ماہرین کے مطابق تحریک انصاف کی رکن خیبر پختونخوا اسمبلی ثریا بی بی کی ڈپٹی اسپیکر کے عہدے کے لیے نامزدگی قانون سازی کے صوبائی امور میں خواتین کی شمولیت اور بہتر صنفی نمائندگی کی جانب ایک مشترکہ کوشش کی عکاسی کرتی ہے۔