شادی سے گریزاں رہنے والے سلمان خان نے 33 سال قبل ایک معروف اداکارہ کا ہاتھ ان کے والد سے مانگا تو انھیں مایوسی کا سامنا کرنا پڑا تھا۔
ٹوئٹر پر شیئر کی گئی ایک پرانی ویڈیو میں اداکار سلمان خان نے انکشاف کیا ہے کہ ایک بار انھوں نے جوہی چاولہ کے والد سے درخواست کی کہ وہ ان کی بیٹی سے شادی کے خواہاں ہیں تو اس پر انھوں نے صاف انکار کردیا تھا۔
بھارتی اداکار سے جب انکار کی وجہ پوچھی گئی تو انھوں نے بتایا کہ ان کا اندازہ ہے کہ شاید جوہی چاولہ کے والد یہ سمجھتے تھے کہ وہ ان کی بیٹی کے لیے موزوں انسان نہیں۔
بالی ووڈ کے مشہور اداکار سلمان خان ہمیشہ شادی سے انکار کرتے آئے ہیں لیکن ان کا سنہ 1990 کا ایک پرانا انٹرویو سامنے آیا ہے جس میں انھوں نے جوہی چاولہ سے اپنی شادی نہ ہوسکنے کا انکشاف کیا۔
بعد ازاں جوہی چاولہ نے سنہ 1995 میں ایک بزنس مین جے مہتا سے شادی کر لی تھی جن سے ان کی ایک بیٹی جھانوی اور بیٹا ارجن ہے۔
جوہی چاولہ اور سلمان خان نے سنہ 1997 میں کامیڈی فلم مستانہ میں ایک ساتھ کام کیا تھا۔
سلمان خان آخری بار شاہ رخ خان کی فلم پٹھان میں کیمیو (فلم میں کسی معروف اداکار کا ایک مختصر کردار) کرتے نظر آئے تھے۔ انھوں نے شاہ رخ خان کی پچھلی فلم زیرو (2018) میں بھی ایک کیمیو کیا تھا۔
