وزیراعلیٰ خیبرپختونخوا علی امین گنڈاپور نے کہا ہے کہ انتخابات میں دھاندلی ہوئی، فارم 45 کے مطابق نتائج تیار کرکے ہمیں ہمارا مینڈیٹ واپس کیا جائے۔
پاکستان تحریک انصاف آج ملک بھر میں مبینہ انتخابی دھاندلی کے خلاف احتجاج کر رہی ہے، پشاور میں بھی تحریک انصاف کی جانب سے احتجاجی جلسہ کیا گیا۔
مزید پڑھیں
- وزیراعظم سے وزیراعلیٰ خیبرپختونخوا کی ملاقات: شہباز شریف نے تعاون کا یقین دلایا ہے، علی امین گنڈاپور
علی امین گنڈاپور نے خطاب کرتے ہوئے کہاکہ انتخابات میں ہونے والی دھاندلی کی کمیشن بناکر شفاف تحقیقات کی جائیں۔
انہوں نے کہاکہ سائفر کے معاملے پر بھی جوڈیشل کمیشن بنانا چاہیے، ہمارے خلاف سازشیں کی گئیں، سائفر خفیہ دستاویز نہیں ڈی کلاسیفائیڈ ہو چکا تھا۔
وزیراعلیٰ نے کہاکہ آصف زرداری نے توشہ خان سے غیرقانونی طریقے سے گاڑیاں لیں اور افسوس کہ آج صدر بن گیا۔ عمران خان کے خلاف بنائے گئے تمام مقدمات غیرقانونی ہیں۔
انہوں نے کہاکہ ہماری مخصوص نشستیں کسی اور کو دینا غیرآئینی و غیرقانونی، آئین توڑنے کے مرتکب افراد کو آرٹیکل 6 کے تحت سزا دی جائے گی۔
انہوں نے کہاکہ ہم انصاف نہ ملنے تک اپنی جدوجہد جاری رکھیں گے۔ ضروری ہے کہ عمران خان کا شفاف ٹرائل ہو۔
علی امین گنڈاپور نے کہاکہ ہمارے کارکنان اور خواتین جیلوں میں ہیں، ایک دن سارے سازشی بے نقاب ہو جائیں گے۔
