پاک بحریہ اور پاکستان میری ٹائم سیکیورٹی ایجنسی کا کشتی ’الاسد‘ کے لاپتا ماہی گیروں کے لیے سرچ آپریشن میں اہم کامیابی حاصل ہوئی ہے۔ پاک بحریہ اور پاکستان میری ٹائم سیکیورٹی ایجنسی نے بقیہ 4 لاپتا ماہی گیروں کے جسد خاکی کھلے سمندر سے نکال لیے۔
لاپتا ماہی گیروں کی کشتی 5 مارچ کو کھلے سمندر میں ہجامڑو کریک کے قریب حادثے کا شکار ہوگئی تھی۔ پاک بحریہ اور پی ایم ایس اے کے ہوائی جہاز، ہیلی کاپٹرز، بحری جہاز اور فاسٹ بوٹس کے ذریعے ریسکیو آپریشن کا آغاز کیا۔ پاک بحریہ اور پی ایم ایس اے کے یونٹس نے گزشتہ روز 10 لاپتا ماہی گیروں کے جسد خاکی ڈھونڈ نکالے تھے۔
تمام لاپتا ماہی گیروں کے جسد خاکی سمندر سے نکال کر متعلقہ سول حکام کے حوالے کیے جاچکے ہیں۔ پاک بحریہ اور پی ایم ایس اے کا لاپتا ماہی گیروں کے لیے مشترکہ سرچ آپریشن کھلے سمندر میں ماہی گیروں کے تحفظ کو یقینی بنانے کے عزم کا غماز ہے۔
