وزیراعظم شہباز شریف کی جانب سے سابق چیئرمین واپڈا ظفر محمود کی بطور چیئرمین ارسا تعیناتی پر صوبہ سندھ کی حکمراں جماعت پیپلز پارٹی کی جانب سے ناراضی کا اظہار کیا گیا ہے۔
سندھ کابینہ نے گزشتہ روز انڈس ریور سسٹم اتھارٹی یعنی ارسا کے چیئرمین کے طور پر متنازع کالاباغ ڈیم کے معروف حامی اور سابق چیئرمین واپڈا ظفر محمود کی حالیہ تقرری پر تحفظات کا اظہار کیا ہے۔
وزیر اعلیٰ مراد علی شاہ کی زیر صدارت کابینہ کے پہلے اجلاس کے بعد جاری اعلامیہ کے مطابق سندھ کابینہ کا موقف ہے کہ ارسا کے چیئرمین کا انتخاب صوبوں یا وفاقی حکومت کے اراکین میں سے ہونا چاہیے، باہر سے کسی کو مقرر کرنا پانی کے معاہدے کی صریح خلاف ورزی ہو گی۔
وزیراعلیٰ سندھ مراد علی شاہ نے اس حوالے سے دو ٹوک موقف اپناتے ہوئے کہا ہے کہ وفاق کا فیصلہ کسی صورت قبول نہیں کیا جاسکتا، اس ضمن میں ان کا کہنا تھا کہ نہ صرف تعیناتی بلکہ جس شخص کو تعینات کیا گیا اس پر بھی اعتراض ہے۔
وزیر اعلیٰ سندھ کے مطابق ارسا کا مقصد ہی یہ تھا کہ اس میں وفاق کا کوئی فرد اثر انداز نہ ہو، نگراں حکومت نے آرڈیننس میں ترمیم کردی کہ وفاق کا ایک نمائندہ ارسا کا ممبر ہوگا۔
صوبہ سندھ کی جانب سے احتجاج کے بعد وزیراعظم شہباز شریف نے نوٹس لیتے ہوئے وزیر اعلی سندھ سے رابطہ کیا ہے، اس ضمن میں صوبائی وزیر برائے آبپاشی جام خان شورو کا کہنا ہے کہ وزیر اعظم نے سندھ کابینہ اور محکمہ آبپاشی کے اعتراضات کی روشنی میں چیئرمین ارسا کی تعیناتی کا نوٹیفکیشن واپس لینے کی یقین دہانی کرادی ہے۔
