شریف خاندان آئے روز کسی نہ کسی حوالے سے خبروں کی زینت بنا رہتا ہے کبھی وزیر اعلیٰ پنجاب مریم نواز کے اچانک دورے تو کبھی کوئی متنازع بیان انہیں خبروں کا موضوع بنائے رکھتے ہیں، اور اس حوالے سے سوشل میڈیا کسی سے پیچھے نہیں۔
ایسا آج اس وقت پھر ہوا جب سابق وزیر اعظم نواز شریف کے لندن میں مقیم دونوں صاحبزادوں حسن اور حسین نواز نے 7 برس بعد وطن واپس آکراسلام آباد کی احتساب عدالت سے نیب کے 3 ریفرنسز میں ضمانت حاصل کرتے ہوئے اپنا ’اشتہاری اسٹیٹس‘ منسوخ کرایا۔
عدالت پیشی کے موقع پر میڈیا سے غیر رسمی گفتگو میں حسین نواز کا کہنا تھا کہ وہ پاکستانی شہری ہیں اور ان کے پاس اور کوئی پاسپورٹ نہیں، ان کے اس بیان کی دیر تھی کہ سوشل میڈیا پر ان کی بہن مریم نواز کی ایک پرانی ویڈیو وائرل ہونا شروع ہوگئی، جس میں وہ کہتی ہیں کہ ان کے بھائی باہر رہتے ہیں اور ان پر یہاں کے قوانین لاگو نہیں ہوتے۔
صارفین نے مریم نواز کی اس پرانی ویڈیو کا موازنہ حسین نواز کے آج کے بیان کی ویڈیو سے کرتے ہوئے سماجی رابطے کی ویب سائٹ ایکس پر شیئر کردی، جس پر مختلف سیاسی و سماجی حلقوں کی جانب سے تنقید کا سلسلہ جا ری ہے، کسی کا کہنا تھا کہ دونوں بہن بھائیوں پر یقین نہیں کرنا چاہیے تو کوئی یہ کہتا نظر آیا کہ ایک شخص جو باہر رہتا ہے اس پر پاکستان کے قوانین کیسے لاگو ہو سکتے ہیں؟
صحافی سلمان درانی نے دونوں ویڈیو شیئر کرتے ہوئے لکھا ہے کہ دونوں میں سے کون سچ بول رہا ہے، فیصلہ آپ خود کر لیں۔
دونوں میں سے کون سچ بول رہا ہے؟ فیصلہ آپ کا۔۔ pic.twitter.com/0cEjQkRQTG
— Salman Durrani (@DurraniViews) March 14, 2024
ملیحہ ہاشمی نے کہا کہ مریم نواز اور حسین نواز کے متضاد بیانات نے ثابت کردیا ہے کہ پاکستانی قوم کو دونوں پر ہی اعتبار نہیں کرنا چاہیے۔
مریم نواز اور حسین نواز نے ایک دوسرے سے الٹ بیان دے کر ثابت کر دیا کہ پاکستانی قوم کو دونوں پر ہی اعتبار نہیں کرنا چاہئے۔ https://t.co/BCjoxjUdRk
— Maleeha Hashmey (@MaleehaHashmey) March 14, 2024
پاکستان تحریک انصاف کی سابق رکن قومی اسمبلی ملیکہ بخاری لکھتی ہیں کہ 24 کروڑ پاکستانی عوام کو سلطنت زرداری اور شریف خاندان کا غلام سمجھا ہوا ہے، جمہوریت میں بادشاہت قائم ہے۔ ’پاکستان کی غیور عوام ان کے غلام ابن غلام اور ان کے بچوں کی غلامی کرنے سے 8 فروری کو انکار کر چکے ہیں۔‘
24 کروڑ پاکستانی عوام کو سلطنت زرداری اور شریف خاندان کا غلام سمجھا ہوا ہے جمہوریت میں بادشاہت قائم ہے
پاکستان کی غیور عوام ان کے غلام ابن غلام اور ان کے بچوں کی غلامی کرنے سے 8 فروری کو انکار کر چکے ہیں https://t.co/sGjW61mzZS
— Maleeka Ali Bokhari (@MalBokhari) March 14, 2024
ایک صارف نے تنقید کرتے ہوئے کہا کہ پھر یہ لوگ کہتے ہیں کہ عوام ہم سے نفرت کیوں کرتی ہے؟
پھر یہ لوگ کہتے ھیں کہ عوام ہم سے نفرت کیوں کرتی ھے. اس طرح اور کیا پیار کرے https://t.co/6My1oWTINd
— Shehryar Karimi (@miankarimi) March 14, 2024
واضح رہے کہ پانامہ اسکینڈل سے جڑے نیب کے 3 ریفرنسز میں سرینڈر کرنے پر احتساب عدالت اسلام آباد نے نواز شریف کے صاحبزادوں حسن نواز اور حسین نواز کے دائمی وارنٹ گرفتاری منسوخ کرتے ہوئے ان کا اشتہاری اسٹیٹس بھی ختم کردیا ہے۔