معروف پاکستانی اداکارہ نوشین شاہ نے الزام عائد کیا ہے کہ مشہور پاکستانی فلم ہدایتکار نبیل الرحمان لطفی اہلیہ کے ہمراہ اُن کے 35 لاکھ روپے لے کر فرار ہوگئےہیں۔
نجی ٹی وی چینل کی رمضان ٹرانسمیشن میں گفتگو کرتے ہوئے انہوں نے پاکستانی ہدایتکار نبیل الرحمان لطفی کے مبینہ فراڈ کے بارے میں بتاتے ہوئے کہا کہ کچھ عرصہ قبل پاکستانی فلم ’13’ کے ہدایتکارنبیل الرحمان لطفی نے انہیں کرپٹو میں سرمایہ کاری کے لیے قائل کیا تھا جس کے لیے اُنہوں نے ان سے 20 لاکھ روپے کی بھاری رقم مانگی۔
انہوں نے مزید کہا’ میں نے نبیل الرحمان لطفی کی زبان پر بھروسہ کرکے اُنہیں 20 لاکھ روپے کی رقم دے دی۔ چند دن بعد اُنہوں نے اپنی آنے والی فلم کے لیے مجھ سے 15 لاکھ روپے اُدھار لیے۔ اور اس طرح میں نے نبیل الرحمان لطفی کو 35 لاکھ روپے کی رقم دستاویزی ثبوت کے بغیر دے دی تھی کیونکہ مجھے اُن کی زبان پر بھروسہ تھا لیکن اُنہوں نے مجھے دھوکا دیا اور میرے 35 لاکھ روپے لے کر فرار ہوگئے‘۔
View this post on Instagram
نوشین شاہ نے الزام عائد کیا کہ نبیل اور اُن کی اہلیہ کئی مشہور شخصیات سے تقریباً 6 کروڑ روپے کی بھاری رقم لے کر فرار ہیں، ان دونوں کے موبائل فونز بھی بند ہیں اور دونوں کے خلاف 2 مختلف ایف آئی آر بھی درج ہیں۔
اداکارہ نے مداحوں سے اپیل کی ہے کہ کسی کی زبان پر بھروسہ کرکے رقم نہ دیں اور اگر آپ نے کسی کو رقم دینی ہے تو مناسب دستاویزات کو یقینی بنائیں۔
اُنہوں نے مزید کہا’میں نے اپنی بیوقوفی اور لاپرواہی کی وجہ سے لاکھوں کی رقم ڈبو دی، میں نہیں چاہتی کہ میری طرح دیگر لوگ بھی دھوکہ کھائیں‘۔
