شیرافضل مروت اور شاندانہ گلزار مریم نواز سے معافی مانگیں، عظمی بخاری

وزیر اطلاعات پنجاب عظمیٰ بخاری نے کہا ہے کہ رہنما تحریک انصاف شیر افضل مروت کے بعد شاندانہ گلزار بھی اپنے بیان سے مکر گئی ہیں، دونوں کو اب مریم نواز سے معافی مانگی چاہیے۔

اپنے ایک بیان میں وزیراطلاعات پنجاب عظمیٰ بخاری نے کہا کہ شیر افضل نے کہا میری سپاری دی گئی ہے اور شاندانہ گلزار نے مریم نواز پر ظل شاہ کے قتل سے متعلق گھٹیا ترین الزام لگایا۔

عظمیٰ بخاری نے کہا کہ یاسمین راشد کا ڈرائیور بہت پہلے بتاچکا ہے کہ ظل شاہ کا قاتل کون ہے، شیر افضل مروت اور شاندانہ گلزار اپنے لیڈر کی طرح دم دبا کر بھاگنے کے عادی ہیں، دونوں کو وزیر اعلیٰ مریم نواز پر الزامات پر معافی مانگنی چاہیے۔

وزیراطلاعات پنجاب نے کہا کہ یہ لوگ پہلے شیر بنتے ہیں پھر پتہ چلتا ہے گیدڑ ہیں، دوسروں کی پگڑیاں اچھالنا، جھوٹے الزامات لگانا اور پروپیگنڈا کرنا پی ٹی آئی کا پسندیدہ مشغلہ ہے، لیکن اب ان کو ہر الزام کا جواب بھی دینا ہوگا اور ثبوت بھی دینا ہوں گے۔

ان کا کہنا تھا کہ یہ کوئی طریقہ نہیں کہ  پہلے الزام لگاؤ، کسی کی کردار کشی کرو، پھر اس سے مکر جاؤ۔