امریکا نے ٹیکنالوجی کمپنی ایپل پر اسمارٹ فون مارکیٹ میں اجارہ داری قائم کرنے کا الزام عائد کرتے ہوئے مقدمہ دائر کر دیا ہے۔
امریکی محکمہ انصاف اور 15 امریکی ریاستوں نے جمعرات کو نیوجرسی کی وفاقی عدالت میں ایپل پر مقدمہ دائر کیا، مقدمے میں الزام لگایا گیا کہ آئی فون بنانے والی کمپنی نے اسمارٹ فون مارکیٹ پر اجارہ داری قائم کی ہے جس سے چھوٹے حریفوں کو نقصان پہنچا اور انہوں نے اپنی مصنوعات کی قیمتیں بڑھا دیں ہیں۔
مقدمے کے مطابق کمپنی پر نئی ایپس کی نمو کو روکنے اور حریف کمپنیوں کی مصنوعات کی کشش کم کرنے کا الزام عائد کیا گیا ہے۔
مزید پڑھیں
اٹارنی جنرل میرک گارلینڈ نے ایک بیان میں کہا کہ ‘صارفین کو زیادہ قیمتیں ادا کرنے کی ضرورت نہیں ہے کیونکہ کمپنیاں عدم اعتماد کے قوانین کی خلاف ورزی کرتی ہیں، اگر ایپل کے اقدامات کو چیلنج نہ کیا گیا تو ایپل صرف اپنے اسمارٹ فون کی اجارہ داری کو مضبوط کرنا جاری رکھے گی۔‘
محکمہ انصاف نے کہا کہ ایپل ایک آئی فون کے لیے 1,599 ڈالر تک چارج کرتی ہے اور انڈسٹری میں کسی بھی دوسری کمپنی سے زیادہ منافع کماتی ہے۔
دائر کی گئی درخواست میں کمپنی کی جانب سے مبینہ طور پر لیے گئے انسداد مسابقتی اقدامات درج کیے گئے ہیں جن میں بڑے پیمانے پر چلنے والی ایپس کو بلاک کرنا، موبائل کلاؤڈ اسٹریمنگ سروسز کو زبردستی دبانا، تھرڈ پارٹی ڈیجیٹل والٹ کو محدود کرنا اور کسی دوسری کمپنی کی بنائی گئی اسمارٹ واچ کی فعالیت کو کم کردینا شامل ہیں۔
ایپل نے تمام الزامات کو مسترد کرتے ہوئے بھرپور طریقے سے مقدمہ لڑنے کے عزم کا اظہار کیا ہے۔
ترجمان ایپل فریڈ سینزکے مطابق یہ مقدمہ غلط حقائق پر مبنی ہے اور ایپل ان الزامات کے خلاف اپنا بھرپور دفاع پیش کرے گی۔
