پاکستان کرکٹ ٹیم کے سابق پاکستان شاہد آفریدی گزشتہ چند روز سے سوشل میڈیا صارفین کے نشانے پر ہیں جس کے بعد انہیں وضاحتی بیان جاری کرنا پڑا، ان کے نام سے ایک جعلی بیان منسوب کیا گیا جس میں دعویٰ کیا جا رہا تھا کہ شاہد آفریدی کا کہنا ہے کہ ’9 مئی کے واقعات میں ملوث کرداروں کو نشان عبرت بنا دو، چاہے کپتان ہو یا پوری ٹیم۔‘
جس کے بعد شاہد آفریدی کے خلاف ٹرینڈ چلنے لگے اور ان کے پرانے بیانات بھی سامنے آنے لگے جس میں وہ عمران خان کے بارے میں بات کرتے نظر آتے ہیں۔ اس کے بعد شاہد آفریدی کو وضاحتی بیان جاری کرنا پڑا جس میں انہوں نے کہا’ عمران خان ہمیشہ سے میرے لیے آئیڈیل رہے ہیں اور ان سے انسپائر ہو کر میں نے کرکٹ شروع کی۔ اگر وہ نہیں ہوتے تو میرا نہیں خیال کہ کرکٹ میں اللہ نے مجھے جو مقام دیا وہ مجھے حاصل ہوتا۔ ایک سیاست دان کی حیثیت سے ان کے اچھے کاموں کی میں نے ہمیشہ تعریف کی ہے اور آگے بھی کرتا رہوں گا‘۔
یوٹیوبر عمران ریاض خان نے شاہد آفریدی کے حوالے سے کہا کہ شاہد آفریدی کو قوم نے آنکھوں پر بٹھایا مگر انہوں نے ملک کا مینڈیٹ چوری کرنے والوں تک کو مبارکبادیں دیں، لوگوں نے اسے برداشت کیا مگر جب اپنی مقبولیت کی دھن میں مگن شاہد خان آفریدی نے پاکستان کے سب سے بڑے عوامی لیڈر پر کھل کر تنقید شروع کی تو لوگوں کے صبر کا پیمانہ لبریز ہو گیا۔
انہوں نے اپنی ٹوئٹ میں مزید کہا تھا کہ پاکستان میں شاہد آفریدی کی طرح ان سے کمتر اور ان سے بہتر بہت سے اسٹارز موجود ہیں جو آج بھی مختلف انداز میں خود کو عوام سے جوڑے ہوئے ہیں، ان سب کی اپنی اپنی سیاسی سوچ ہے، ان میں سے کسی نے بھی عوام کی دل آزاری نہیں کی لیکن شاہد آفریدی کی نظریں شاید کسی اور ٹارگٹ پر مرکوز ہیں۔
شاہد آفریدی کو قوم نے سر آنکھوں پر بٹھایا مگر انہوں نے ملک لوٹنے والوں سے لے کر مینڈیٹ چوری کرنے والوں تک کو مبارکبادیں دیں۔ لوگوں نے برادشت کیا مگر جب اپنی مقبولیت کی دھن میں مگن شاہد خان آفریدی نے پاکستان کے سب سے بڑے عوامی لیڈر پر کھل کر تنقید کرنا شروع کی تو لوگوں کے صبر…
— Imran Khan (@ImranRiazKhan) March 22, 2024
عمران ریاض خان کا کہنا تھا کہ عہدوں کے حصول کے لیے عزت داؤ پر لگانا ایک ہیرو کو زیب نہیں دیتا، اگر بولنا ہی تھا تو شاہد آفریدی کو ظلم اور جبر کے خلاف بولنا چاہیے تھا تاکہ جن لوگوں نے ان سے پیار کیا ان کی محبتوں کا حق ادا ہوتا مگر لالہ نے ہمیشہ غلط شاٹ کھیل کر خود کو آؤٹ کروانے کی روایت برقرار رکھی، آفریدی نے ایک مرتبہ پھر غلط شاٹ سلیکشن کی۔
عمران ریاض خان کی جانب سے تنقید پر قومی ٹیم کے سابق کپتان شاہد آفریدی نے بھی انہیں ’ٹرول‘ قرار دے دیا۔ ان کا کہنا تھا کہ لائک، ریٹویٹ، ویوز وغیرہ کے چکر میں سچ اور جھوٹ میں فرق کرنا بہت مشکل ہو گیا ہے۔ ایک صحافی اور ٹرول میں یہ ہی فرق ہوتا ہے کہ صحافی تحقیق کرتا ہے۔ بہتان تراشی تو سب سے آسان کام ہے۔ میں آج بھی اپنی بات پر قائم ہوں کہ عمران بھائی میرے رول ماڈل تھے جنھیں دیکھ کر میں نے کرکٹ شروع کی ورنہ میں کرکٹر نہ ہوتا۔ جھوٹ اور پراپیگنڈا کی وجہ سے نہ میرا موقف بدلے گا اور نہ ہی اس سے تحریک انصاف یا عمران خان کی کوئی خدمت ہو گی
پاکستان تحریک انصاف کے رہنما عاطف خان نے شاہد آفریدی کے بیانات پر رد عمل دیتے ہوئے کہا کہ ان کا جھکاؤ مسلم لیگ ن کی طرف ہے۔ شاہد آفریدی کھل کر سامنے آئیں تاکہ عوام ان کو ان کی اصل جگہ دکھا سکیں۔
شاہد آفریدی کا جھکاو مسلم لیگ ن کی طرف ہے۔ شاہد آفریدی کھل کر سامنے آئیں تاکہ عوام انکو انکی اصل جگہ دکھا سکیں۔ عاطف خان کا شاہد آفریدی کے روئیے پر ردعمل pic.twitter.com/4aO7sZgu0M
— Atif Khan (@AtifKhanpti) March 24, 2024
پاکستان تحریک انصاف کے سینئر رہنما شیر افضل مروت نے شاہد آفریدی کے خلاف سوشل میڈیا پر چلائی جانے والی مہم کو جھوٹ اور پروپیگنڈا قرار دیتے ہوئے اس کی شدید الفاظ میں مذمت کی اور کہا’ شاہد آفریدی کے خلاف 9 مئی کو ایک مبینہ بیان کی وجہ مہم چلائی جارہی ہے، میں نے شاہد آفریدی کے خلاف مجھ سے منسوب چند بیانات دیکھے ہیں، اس لیے ہمیں جھوٹی خبروں کی تردید کرنی چاہیے‘۔
انہوں نے کہا’ شاہد آفریدی کی جانب سے ایسا کوئی بیان سامنے نہیں آیا اور ایسا لگتا ہے کہ کچھ عناصر ان کے خلاف جھوٹی خبریں پھیلا رہے ہیں، میں جانتا ہوں کہ شاہد آفریدی عمران خان کے لیے ایک خاص احترام میں رکھتے ہیں اور شاہد آفریدی کے خلاف پروپیگنڈا کرنے میں ان لوگوں کا ہاتھ لگتا ہے جو ان کے ساتھ ذاتی اسکور طے کرنا چاہتے ہیں‘۔
شاہد آفریدی کیوں؟
اب شاہد آفریدی کے 9 مئی کو ایک مبینہ بیان کی وجہ سے ان کے خلاف مہم چل رہی ہے۔ میں نے شاہد آفریدی کے خلاف مجھ سے منسوب چند بیانات دیکھے۔ اس لیے ہمیں جھوٹی خبروں کی تردید کرنی چاہیے۔ مجھے شاہد آفریدی کی جانب سے ایسا کوئی بیان سامنے نہیں آیا اور ایسا لگتا ہے کہ کچھ…— Sher Afzal Khan Marwat (@sherafzalmarwat) March 23, 2024
شیر افضل مروت کا کہنا تھا کہ پی ٹی آئی کی سوشل میڈیا ٹیموں سے گزارش ہے کہ شاہد آفریدی کے بارے میں اچھی باتیں پھیلائیں، ہمیں مستقبل میں پی ٹی آئی کے پلیٹ فارم سے ہونے والے جھوٹے پروپیگنڈے پر بھی تیزی سے ردعمل ظاہر کرنے کی ضرورت ہے، افراد کے خلاف بدنیتی پر مبنی مہم میں نادانستہ شرکت کو جلد از جلد روک دیا جانا چاہیے۔ انہوں نے مزید کہا’ میں ذاتی طور پر تصدیق کرتا ہوں کہ شاہد آفریدی کے خلاف مہم جھوٹی اور فضول ہے اور مجھے اس پر دلی افسوس ہے‘۔
شیرافضل مروت کے شاہد آفریدی سے متعلق بیان پرپی ٹی آئی کے سوشل میڈیا ایکٹیوسٹ اظہر مشوانی نے ردعمل دیتے ہوئے کہا کہ ’مروت صاحب! آپ کا یہ جملہ قابل مذمت ہے اور فوری طور پر ڈیلیٹ کرنا چاہیے، سوشل میڈیا پر پارٹی کی اندرونی باتوں کے جواب نہ دیا کریں اور نہ ہی کمنٹ کیا کریں‘۔
اظہر مشوانی نے کہا کہ ہر دوسرے دن آپ کا کسی پارٹی لیڈر یا پارٹی کے اندرونی معاملے پر بیان آ جاتا ہے جس سے سوشل میڈیا پر ہمارے سپورٹرز کی توجہ عمران خان سمیت اہم موضوعات سے ہٹ جاتی ہے اور مختلف آرا والے گروپ آپس میں لڑنا شروع ہو جاتے ہیں، کچھ آپ کو ٹھیک کہتے، کچھ غلط اور کچھ لڑائیاں ختم کروانے میں لگ جاتے ہیں- لہذا اس سے گریز کریں
مروت صاحب آپ کا یہ جملہ انتہائی قابل مذمت ہے اور فوری طور پر ڈیلیٹ کرنا چاہیے
“ ہمیں مستقبل میں پی ٹی آئی کے پلیٹ فارم سے ہونے والے جھوٹے پروپیگنڈے پر بھی تیزی سے ردعمل ظاہر کرنے کی ضرورت ہے”PTI کے پلیٹ فارم (آفیشل اکاؤنٹ) عمران خان کے بیانیے کو آگے بڑھاتے ہیں نا کہ پراپیگنڈا… https://t.co/fuEMyFWdYl
— Azhar Mashwani (@MashwaniAzhar) March 23, 2024
واضح رہے کہ شاہد آفریدی ان دنوں خود سے منسوب سوشل میڈیا پر مختلف اکاؤنٹ سے پوسٹ کیے جانے والے بیانات سے کافی پریشان ہیں جس کی وجہ سے انہیں تحریک انصاف کے حامیوں کی جانب سے مسلسل تنقید کا سامنا ہے۔
