کراچی کے ضلع کیماڑی میں تھانہ موچکو کی پولیس نے کارروائی کرکے ایرانی ڈیزل اسمگل کرنے کی کوشش ناکام بنا دی، 3500 لیٹر ایرانی ڈیزل برآمد کرلیا ہے۔
مزید پڑھیں
ایس ایس پی کیماڑی کیپٹن (ر) فیضان علی کے مطابق موچکو چیک پوسٹ پر دوران چیکنگ حب چوکی بلوچستان کی جانب سے آںے والے ٹرالر کو روکا گیا، ٹرالر کی تلاشی پر اس کے خفیہ خانوں سے 3500 لیٹر ایرانی ڈیزل برآمد ہوا ہے، ایرانی ڈیزل کراچی اسمگل کیا جارہا تھا جس کی مالیت 8 لاکھ روپے سے زیادہ بنتی ہے۔
پولیس نے ڈیزل اسمگلنگ میں ملوث نعمت اللہ نامی ملزم کو گرفتار کرکے برآمد شدہ ایرانی ڈیزل اور ٹرالر قبضے میں لے لیا۔
کارروائی ایس ایچ او تھانہ موچکو اور سب انسپکٹر سید محمد عدنان کی سربراہی میں چوکی انچارج موچکو جہانگیر موسیٰ نے اسٹاف کے ہمراہ عمل میں لائی۔
واضح رہے کہ پاکستان میں پیٹرولیم مصنوعات کی قیمتیں بڑھنے کے بعد ایران سے بلوچستان میں ایرانی پیٹرول اور ڈیزل کی اسمگلنگ بڑھ گئی ہے، قانون نافذ کرنے والے ادارے اور کسٹم مل کر اس کا سدباب کرنے کی کوشش میں لگے ہوئے ہیں، تاہم یہ اسمگلنگ روز بہ روز بڑھتی ہی جارہی ہے۔
