کراچی کے علاقے سرجانی ٹاؤن میں معاشی تنگ دستی سے پریشان شہری نے مبینہ طور پر بیوی سمیت دو بچیوں کو زہر دیدیا ۔ 2 سالہ بچی دم توڑ گئی۔
ریسکیو ذرائع کے مطابق کراچی کے علاقے سرجانی ٹاؤن سیکٹر 10 میں رہائش پذیر 45 سالہ اظہر نے پہلے اپنی بیوی فاطمہ اور پھر دونوں بچیوں کو زہر دیا۔ ملزم نے بیوی بچوں کو مبینہ طور پر زہر دینے کے بعد خودکشی کی بھی کوشش کی۔
واقعہ کی اطلاع ملتے ہی ریسکیو ٹیم موقع پرپہنچ گئی اور تمام افراد کو ہسپتال منتقل کیا گیا ۔
ریسکیو ذرائع کے مطابق ہسپتال میں موجود دیگر3 افرادکوطبی امداد دی جارہی ہے۔ بچ جانے والوں میں بیوی اور4 سالہ بچی کی حالت تشویشناک ہے۔ زہر خوارنی سے جاںبر نہ ہونے والی بچی کی شناخت ام ہانیہ کےنام سے ہوئی ہے۔
پولیس کو دیے گئے ابتدائی بیان کے مطابق اظہر کے معاشی حالت بہتر نہیں تھے۔ کافی روز سے بیروزگاری کے باعث گھریلو جھگڑے بھی ہوئے تھے۔ اظہر کی بیٹی اور بیوی اس وقت آئی سی یو میں زیر علاج ہیں۔
عباسی شہید اسپتال کے باہر اظہر کی بھابھی نے میڈیا کو بتایا کہ انہیں اظہر نے ہی فون کرکے زہرخوارنی کی بابت آگاہ کیا۔
’معلوم نہیں کہ زہر کیسے کھایا۔ اس بات کا اندازہ تھا کہ کئی روز سے اظہر کے گھر میں راشن نہیں تھا۔ اظہر کی معصوم بچی کی موت ہوچکی ہے۔‘
پولیس ذرائع کے مطابق کرایہ کے مکان میں رہائش پذیر اظہر ایک فیکٹری میں ملازمت کرتا تھا جہاں سے اسے کئی روز قبل فارغ کردیا گیا تھا۔
