راولپنڈی کے نواحی علاقے کلرسیداں ڈھوک بیلہ میں پرانی دشمنی پر فائرنگ کے نتیجے میں چار افراد کو قتل کر دیا گیا۔ ملزم موقع سے فرار ہونے میں کامیاب ہوگیا۔
پولیس کے مطابق رات گئے کلر سیداں ڈھوک بیلہ میں نصیر نامی ملزم نے قتل کی واردات میں صلح نہ کرنے کی پاداش میں دو خواتین سمیت چار افراد کو فائرنگ کرکے موت کے گھاٹ اتار دیا۔
واقع کی اطلاع ملتے ہی ڈی ایس پی کہوٹہ پولیس کی ٹیم سمیت جائے وقوعہ پر پہنچ گئے۔ پولیس کے مطابق ملزم نصیر اپنے رشتہ دار اخمت حسین سے قتل کی پرانی واردات میں زبردستی صلح چاہتا تھا جبکہ اس کا سوتیلا بھائی مدعی اخمت حسین اس پر راضی نہ ہوا۔
اس پر ملزم نے صلح میں ناکامی دیکھتے ہوئے اندھا دھند فائرنگ کر کے اپنی بھابھی، بھتیجی، بھتیجےعنصر سمیت چار افراد قتل کر دیا اور موقع سے فرار ہوگیا۔
روات پولیس اسٹیشن نے شواہد اکٹھے کرکے تفتیش کا آغاز کر دیا ہے جبکہ ملزم کی گرفتاری کے لیے چھاپہ مار ٹیم بھی تشکیل دے دی ہے۔
