بھارتی ریاست اتر پردیش کے شہر گریٹر نوائیڈا کی ایک عدالت نے سیما حیدر کے پاکستانی شوہر غلام حیدر کو طلب کرتے ہوئے 10 جون سے قبل پیش ہونے کی ہدایت کردی۔
عدالت میں غلام حیدر کے کیس کی پیروی کرنے والے وکیل مومن ملک نے کہا کہ ان کے مؤکل عدالت میں پیش ہوجائیں گے۔
کچھ ہفتے قبل سیما کے پاکستانی شوہر غلام حیدر نے ایک بھارتی وکیل کے ذریعے نوئیڈا کی فیملی کورٹ میں درخواست دائر کی تھی، جس میں سچن مینا کے ساتھ سیما کی شادی کو چیلنج کیا گیا تھا۔
عدالت میں دائر درخواست میں غلام حیدر نے اپنے بچوں کا مذہب تبدیل کرنے کو بھی چیلنج کیا تھا۔
غلام حیدر کے وکیل مومن ملک کا دعویٰ ہے کہ سیما نے غلام حیدر سے طلاق نہیں لی تھی اس لیے سچن کے ساتھ ان کی شادی درست نہیں تھی ۔جس پر عدالت نے سیماحیدر کو 27 مئی کو عدالت میں پیش ہونے کی ہدایت کر رکھی ہے۔
