پاکستان پیپلزپارٹی کے چیئرمین بلاول بھٹو نے سندھ میں ضمنی بلدیاتی انتخابات کا شیڈول مسترد کرتے ہوئے اسے ہائی کورٹ میں چیلنج کرنے کااعلان کیا ہے۔
کراچی میں شہید ذوالفقار علی بھٹو ادارہ برائے امراض قلب منصوبےکا سنگ بنیاد رکھنے کی تقریب سے خطاب میں بلاول بھٹو کا کہنا تھا کہ کراچی کا میئر جلد جیالا ہوگا مگر مخالفین کو یہ ہضم نہیں ہورہا اور کوئی قوت بھی نہیں چاہتی کہ ایسا ہو۔
چیئرمین پاکستان پیپلز پارٹی اور وزیر خارجہ بلاول بھٹو زرداری نے لانڈھی کراچی میں 1200 بستروں پر مشتمل دنیا کے سب سے بڑے دل کا علاج بلکل مفت فراہم کرنے والے اسپتال “ذوالفقار علی بھٹو انسٹی ٹیوٹ آف کارڈ یو ویسکیولر ڈزیز” کا سنگ بنیاد رکھ دیا۔@BBhuttoZardari pic.twitter.com/a01w1QmuZ1
— PPP (@MediaCellPPP) March 20, 2023
بلاول بھٹو نے کہا کہ سندھ میں بلدیاتی انتخابات ہونے کے باوجود نمائندے نہیں ہیں، اگر پہلے الیکشن ہوتے تو منتخب نمائندے سیلاب کی تباہ کاریوں کے وقت لوگوں کی مدد کرتے۔
بتایاجائے بلدیاتی عمل کے آگے بڑھنے کی راہ میں کون رکاوٹ ہے
چیئرمین پیپلزپارٹی نے کہا کہ ہم پر تنقید کی جاتی تھی کہ پیپلزپارٹی بلدیاتی انتخابات کی راہ میں رکاوٹ ہے تو اب بتائیں کہ اس عمل کو کون روک رہا ہے ۔
وزیرخارجہ نے کہا کہ ہم نے ہمیشہ دہشت کا مقابلہ جمہوری طریقے سے کیا، قربانیاں دے کر نسلوں کی محنت سے کراچی کے بلدیاتی انتخابات میں کامیابی حاصل کی ہے کیوں کہ ہم کبھی یہاں بیٹھے دہشت گردوں کامقابلہ کرتے تھے اور کبھی باہر بیٹھے دہشت گردوں کا سامنا ہوتا تھا۔
“ہم پر الزامات لگتے تھے کہ ہم بلدیاتی انتخابات نہیں کروانا چاہتے، تو اب جواب دو! ہم نے انتخابات کروائے ہیں تو اب کون روک رہا ہے؟ کس کو جیالا میئر سے خوف ہے؟”
چیئرمین پاکستان پیپلز پارٹی بلاول بھٹو زرداری @BBhuttoZardari
3/3— PPP (@MediaCellPPP) March 20, 2023
چیئرمین پیپلزپارٹی نے کہا کہ پیپلزپارٹی ایک امن پسند جماعت ہے جس کا انتہا پسندی سے کوئی تعلق نہیں۔ جب بھی کسی عدالت یا ادارے پر حملہ ہو تو ہم اس ادارے کے ساتھ کھڑے ہوتے ہیں ۔ انہوں نے کہا کہ جب خلاف میرٹ فیصلے ہورہے تھے تو تب بھی ہم نے ہی آواز اٹھائی۔
بلاول بھٹو زرداری کا کہنا تھا کہ امن اور اتحاد کی سیاست اسی میں ہے کہ میئر اور ضلع چیئرمین کے انتخابات فوری کرائے جائیں ورنہ اس کے اثرات بہت گہرے ہوں گے ۔انہوں نے کہا کہ ہمیں نفرت اور تعصب کی سیاست کا خاتمہ کرنا ہوگا۔
بلاول بھٹو نے تقریب سے خطاب کرتے ہوئے کہا کہ ہمیں مردم شماری پر تحفظات ہیں۔
سندھ حکومت دنیا کا بڑا کارڈیک اسپتال بنانے جارہی ہے،مرادعلی شاہ
تقریب سے خطاب کرتے ہوئے وزیراعلیٰ سندھ مراد علی شاہ نے کہا کہ سندھ حکومت دنیا کا سب سے بڑا کارڈیک اسپتال بنانے جا رہی ہے اور یہ اسپتال 1200 بستروں پر مشتمل ہوگا۔
مراد علی شاہ کا کہنا تھا کہ عوام کی سہولت کے لیے لانڈھی میں امراض قلب کا اسپتال بنا رہے ہیں کیوں کہ اس علاج میں این آئی سی وی ڈی نے قابلِ ستائش کامیابیاں حاصل کی ہیں۔