میانوالی کا جہاز چوک پاک فوج کے حق میں نعروں سے گونج اٹھا

سانحہ 9 مئی کا ایک سال مکمل ہونے پر میانوالی میں اسکولوں کے بچوں کی جانب سے پاک فوج کے ساتھ اظہار یکجہتی کے لیے ریلی نکالی گئی۔

ریلی میں سینٹرل ماڈل اسکول میانوالی سمیت مختلف اسکولوں کے طلبا اور اساتذہ نے بڑی تعداد میں شرکت کی۔

اس موقع پر بچوں نے پلے کارڈز اٹھا رکھے تھے جن پر پاک فوج، پولیس اور سیکیورٹی اداروں کے ساتھ اظہار یکجہتی کے نعرے درج تھے۔

ریلی میانوالی شہر کے مختلف علاقوں سے ہوتی ہوئی جہاز چوک پہنچی جہاں شرکا کی جانب سے پاک فوج کے حق میں نعرے لگائے گئے۔

ریلی شرکا نے شرپسند عناصر کو پیغام دیا کہ 9 مئی جیسے واقعات   آئندہ ہوئے تو ملوث عناصر کے ساتھ آہنی ہاتھوں سے نمٹا جائے گا۔ عوام کی جانب سے پاکستان کی مسلح افواج کے ساتھ اظہار یکجہتی اس بات کا ثبوت ہے کہ عوام نے شر پسند سیاسی ٹولے کو مسترد کر دیا ہے۔

واضح رہے کہ میانوالی  کے جہاز چوک پر 9 مئی 2023 کو شرپسندوں کی جانب سے پاکستان ائیر فورس کے نصب کردہ جہاز کو آگ لگا دی تھی۔