کپیٹل سٹی پولیس پشاور نے فقیر آباد ڈویژن کے علاقے سے کروڑوں روپے مالیت کے صدیوں پرانے نوادرات اسمگل کرنے کی کوشش ناکام بناتے ہوئے اسمگلنگ میں ملوث ملزم کو گرفتار کر لیا ہے۔
محکمہ آثار قدیمہ کے ماہرین کے مطابق برآمد کی جانے والی نوادرات صدیوں پرانی ہیں، جن کی مالیت کا تخمینہ کروڑوں روپے لگایا گیا ہے، ضروری قانونی کارروائی کے برآمد شدہ نوادرات متعلقہ ڈیپارٹمنٹ کے حوالے کردیے جائیں گے۔
پولیس ترجمان کے مطابق پہاڑی پورہ پولیس کو خفیہ ذرائع سے اطلاع موصول ہوئی کہ آثار قدیمہ کی قیمتی نوادرات کے غیر قانونی نقل و حمل میں ملوث افرادکسی بھی وقت کروڑوں روپے مالیت کے قیمتی نوادرات اسمگل کرنے کی کوشش کریں گے۔
اطلاع کو مصدقہ جانتے ہوئے افسران بالا کی خصوصی ہدایات پر شہر کے تمام داخلی و خارجی راستوں پر چیکنگ کا عمل مزید سخت کرنے کی ہدایت کی گئی تھی، حاجی کیمپ کے قریب ناکہ پر ایک مشکوک موٹر کار کو روک کر تلاشی لینے پر قدیم زمانے کے نوادرات برآمد ہوئے۔
ایک ملزم شیر ولی ولد اکبر ولی سکنہ چترال کو گرفتار کر لیا ہے، گرفتار ملزم نے ابتدائی تفتیش کے دوران نوادرات اسمگل کرنے کی منصوبہ بندی کی تصدیق کی ہے، ملزم کے خلاف ضروری کارروائی کرکے مزید قانونی کارروائی کے لیے متعلقہ ڈیپارٹمنٹ کے حوالے کیا جائے گا۔
محکمہ آثار قدیمہ کے ماہرین کے مطابق برآمد ہونے والی نوادرات صدیوں پرانی ہے جس کی مالیت کروڑوں روپے بتائی جاتی ہے۔
