وزیراعلیٰ بلوچستان نے فائنل میچ سے قبل پاکستان ہاکی ٹیم سے رابطہ کیوں کیا؟

وزیراعلیٰ بلوچستان میر سرفراز بگٹی نے پاکستان ہاکی ٹیم سے ویڈیو لنک پر رابطہ کرکے ہاکی ٹیم کی بہترین کارکردگی پر کپتان اور پوری ٹیم کو شاباش دی ہے۔

وزیراعلیٰ بلوچستان نے کہا کہ 13 سال بعد فائنل میچ کے لیے کوالیفائی کرنے پر ٹیم خراج تحسین کی مستحق ہے۔ پاکستان ہاکی ٹیم ہمارا فخر ہے، ان شا اللہ فائنل میچ پاکستان جیتے گا۔

وزیراعلی میر سرفراز بگٹی نے کپتان سمیت پوری ٹیم کو دعوت دیتے ہوئے کہا کہ ہاکی ٹیم ہماری ہیرو ہے، فائنل میچ جیت کر بلوچستان آئیں۔

یاد رہے کہ پاکستان 13 برس بعد سلطان اذلان شاہ ہاکی کپ کے فائنل میں پہنچ گیا۔ فائنل میچ آج (11 مئی) پاکستان اور جاپان کے درمیان شام 5 بج کر 30 منٹ پر کھیلا جائے گا۔ آخری راؤنڈ میچ میں نیوزی لینڈ کے خلاف میچ 1-1 گول سے برابر ہونے کے باوجود پاکستان فائنل میں جگہ بنانے میں کامیاب ہو گیا تھا۔

پوائنٹس ٹیبل پر 5 میچ میں مجموعی طور 11 پوائنٹس کے ساتھ پاکستان فائنل میں جگہ بنانے میں کامیاب ہوا تھا۔ گرین شرٹس نے 5 میچوں میں سے 3 میں کامیابی سمیٹی جبکہ 2 میچ برابری کے ساتھ ختم کیے تھے۔