مقبوضہ جموں و کشمیرکی حیثیت سے متعلق بھارت کے یکطرفہ اور غیرقانونی اقدام کو مسترد کرتے ہیں، وزیراعظم

وزیراعظم شہباز شریف نے کہا ہے کہ پاکستان واضح طور پر بھارتی غیرقانونی طور پر مقبوضہ جموں و کشمیر کی حیثیت سے متعلق بھارت کے یکطرفہ اور غیر قانونی اقدام کو مسترد کرتا ہے۔

دورہ آزاد کشمیر: احتجاجی تحریک میں چندشرپسند عناصر بھی شامل تھے، وزیراعظم پاکستان

اس سے قبل آزاد جموں و کشمیر کابینہ کے اجلاس سے خطاب کرتے ہوئے وزیراعظم شہباز شریف نے کہا ہے کہ آزاد کشمیر میں حالیہ احتجاجی تحریک میں ایسے شرپسند عناصر بھی شامل تھے، جن کا مقصد آزاد کشمیر میں انسانی جانوں کا ضیاع، توڑ پھوڑ اور جلاؤ گھیراؤ کرنا تھا۔

وزیراعظم شہباز شریف کا کہنا تھا کہ کہا کہ اس تحریک میں ایسے لوگ شامل تھے جو اپنے جائز مطالبات کے لیے اپنا فریضہ سرانجام دے رہے تھے مگر بدقسمتی سے احتجاج کے دوران پولیس کا ایک سپاہی اور شہری جاں بحق ہوئے اور توڑ پھوڑ ہوئی جس کی جتنی بھی مذمت کی جائے کم ہے۔

انہوں نے کہا کہ شہدا کے لیے جس پیکیج کا اعلان کیا گیا تھا وہ انہیں فی الفور پہنچایا جائے گا، حکومت نے اس معاملے کو جلد از جلد ختم کرنے کی کوشش کی اور تمام مطالبات بلاتاخیر منظور کیے۔

انہوں نے کہا کشمیر میں ایک طاقتور قوم بستی ہے جو اپنے حقوق کی آواز اٹاھانا جانتی ہے اور پاکستان کے لیے جذبات رکھتی ہے، اسی طرح پاکستان اور اس کے 25 کروڑ عوام کشمیریوں کے لیے جذبات رکھتے ہیں اور ان کے لیے ہر فورم پر آواز اٹھاتے ہیں۔ انہوں نے کہا کہ حال ہی میں او آئی سی میں پاکستان نے کشمیر کے لیے بھرپور طریقے سے آواز اٹھائی۔

’پاکستان نے ہمیشہ کشمیریوں کی اخلاقی و سفارتی حمایت کی‘

انہوں نے کہا کہ مقبوضہ کشمیر میں شہدا کی قربانیاں ضائع نہیں جائیں گی، پاکستان نے ہمیشہ کشمیریوں کے لیے اخلاقی حمایت کا اعلان کیا ہے اور آئندہ بھی کرتے رہیں گے۔ انہوں نے کہا کشمیر اور فلسطین میں لوگوں کو شہید کیا جارہا ہے اور دنیا تماشائی بنی ہوئی ہے لیکن ہمیں اپنی جدوجہد اور سفارتی حمایت جاری رکھنی ہے۔

او آئی سی کی کانفرنس میں بھی نائب وزیراعظم اور وزیر خارجہ اسحاق ڈار نے کشمیری عوام کے لئے بھرپور آوازاٹھائی اور جو اعلامیہ جاری ہوا اس میں کشمیر کا بھرپور طریقے سے ذکر کیا گیا ہے۔ ایران کے صدر ڈاکٹر ابراہیم رئیسی کے دورہ پاکستان کے موقع پر پریس کانفرنس میں میں نے کشمیر کی بات بھرپور طریقے سے کی اور مسئلہ کشمیرپر سیرحاصل گفتگو ہوئی۔ یہ صرف زبانی باتیں نہیں ہیں ،یہ دلوں کی بات ہے ۔ کشمیریوں کی ہر فورم پر اخلاقی و سفارتی امداد جاری رکھیں گے۔

شہباز شریف نے آزاد کشمیر کی کابینہ سے کہا کہ آپ کی ترقی و خوشحالی پاکستان کی ترقی و خوشحالی سے جڑی ہوئی ہے، مل کر یہ سفر طے کریں گے، ہمارے درمیان جو باتیں طے ہیں اس پر عمل پیرا ہونا ہمارا فرض ہے۔

’مل کر معاملات طے کریں تاکہ آئندہ ایسا واقعہ رونما نہ ہو‘

انہوں نے کہا کہ آئی ایم ایف ٹیم آئی ہوئی ہے اس کی وجہ سے ہمارے وزیر اور سیکریٹری توانائی مصروف تھے، جونہی آئی ایم ایف ٹیم جائے گی وہ آزاد کشمیر کابینہ سے اس پر سیر حاصل گفتگو کرکے مسائل کو مستقل طور پر حل کریں گے تاکہ آئندہ ایسا واقعہ رونما نہ ہو۔ وزیراعظم نے دوران اجلاس سیکریٹری آبی وسائل سے منگلا ڈیم فیز ٹو میں زیرتعمیر پل کو بلاتاخیر مکمل کرانے کی ہدایت بھی دی۔

وزیراعظم شہباز شریف نے آزاد کشمیر کے وزیراعظم چوہدری انوارالحق سے کہا کہ وہ اور ان کی کابینہ پاکستان کی مختلف وزارتوں کے ساتھ بیٹھیں اور اپنے معاملات پر بات کریں اور شارٹ ٹرم، مڈ ٹرم، اور لانگ ٹرم منصوبہ بندی طے کرلیں۔ پانی کے حوالے سے جو معاملات ہیں ان کابھی حل نکالا جائےگا۔

شہباز شریف نے وزیراعظم آزاد کشمیر کو سادگی اپنانے اور حکومتی اخراجات میں کمی کے لیے اقدامات کرنے پر سراہا اور کہا کہ پاکستان بھی قرضوں مین جکڑا ہوا ہے، ان قرضوں سے جان چھڑانے کے لیے محنت کرنا ہوگی۔ انہوں نے کہا آزاد کشمیر اور پاکستان میں معدنیات کی کمی نہیں لیکن 76 سال میں ہم نے وہ محنت اور جدوجہد نہیں کی جس کی بدولت ہم ان خزانوں کو سامنے لے کر آتے۔

23 ارب روپے کی فوری فراہمی پر وزیراعظم شہباز شریف کے شکرگزار ہیں، وزیراعظم آزاد کشمیر

وزیراعظم آزاد جموں و کشمیر اور آزاد حکومت ریاست جموں و کشمیر کی کابینہ نے آزاد جموں و کشمیر کی حالیہ صورتحال پر قابو پانے کیلئے 23 ارب روپے کی فوری فراہمی پر وزیراعظم شہباز شریف سے اظہار تشکر اور انہیں شاندار خراج تحسین پیش کیا ہے۔

آزاد جموں و کشمیر کابینہ کے خصوصی اجلاس میں وزیراعظم آزاد جموں و کشمیر اور کابینہ ارکان نے وزیراعظم پاکستان کو آزاد جموں و کشمیر آمد پر خوش آمدید کہا ۔ وزیراعظم آزاد جموں و کشمیرچوہدری انوار الحق نے کہا کہ حکومت پاکستان نے کشمیری عوام کے مسائل کو حل کرنے کیلئے 23 ارب روپے کی فوری فراہمی کی منظوری دی ، وزیراعظم نے 2 دن پہلے اعلان کیا تھا اور آج یہ رقم منتقل ہو چکی ہے ، ہم نے آج سے پہلے اس قدر جلد عملدرآمد نہیں دیکھا ۔

انہوں نے کہا کہ وزیراعظم شہبا ز شریف نے حقیقی معنوں میں بڑے بھائی کا کردار ادا کیا ہے اور ان کایہاں آنا یہ ظاہر کرتا ہے کہ آزاد جموں و کشمیر پاکستان کے لئے کس قدر اہمیت کا حامل خطہ ہے۔

آپ اور آپ کے پیاروں کی روزمرہ زندگی کو متاثر کرسکنے والے واقعات کی اپ ڈیٹس کے لیے واٹس ایپ پر وی نیوز کا ’آفیشل گروپ‘ یا ’آفیشل چینل‘ جوائن کریں