ایف آئی اے اینٹی کرپشن سرکل کراچی نے جعلی فائلوں کے نام پر زمینوں کے قبضے میں ملوث 3 ملزمان گرفتار کر لیے ہیں۔ ملزمان پلاٹوں کی جعلی فائلیں تیار کرنے میں ملوث تھے۔
ترجمان ایف آئی اے کے مطابق گرفتار ملزمان میں عبدالسلام مندرو، اختر علی اور محمد انیق شامل ہیں، تینوں ملزمان کو کراچی سے گرفتار کیا گیا ہے۔ ملزمان نے پاکستان آڈٹ ڈیپارٹمنٹ ایمپلائز ہاؤسنگ سوسائٹی کے پلاٹوں کی متعدد جعلی فائلیں تیار کی تھیں۔
مزید پڑھیں
ترجمان کے مطابق ملزمان جعلی فائلوں کی آڑ میں پلاٹوں کے قبضے میں ملوث تھے۔ ملزمان کے خلاف کارروائی سندھ ہائیکورٹ کے احکامات کی روشنی میں عمل میں لائی گئی۔ زمینوں کے قبضے میں ملوث سندھ کوآپریٹیو ڈیپارٹمنٹ اور ان لینڈ ریونیو ڈیپارٹمنٹ کے ملازمین کے خلاف بھی مقدمہ درج ہے۔ ملزمان کی گرفتاری کے لئے چھاپے مارے جا رہے ہیں۔