پاکستانی سینئر اداکارہ افشاں قریشی نے اپنے بیٹے و اداکار فیصل قریشی سے متعلق دیے گئے بیان پر نیا موقف جاری کر دیا۔
اداکارہ افشاں قریشی نے حال ہی میں ایک یوٹیوب چینل کو دیے گئے انٹرویو میں اپنے بیٹے سے متعلق گفتگو کی تھی۔ ان کا کہنا تھا کہ فیصل قریشی چھوٹے سے تھے تو خالد بٹ سعودی عرب عمرے کے لیے روانہ ہو رہے تھے۔ میں نے انہیں ایک خط لکھ کر دیا جس میں لکھا تھا کہ اللہ پاک فیصل قریشی کو بھارتی اسٹار امیتابھ بچن جتنی عزت اور شہرت سے نوازے اور پھر میری یہ دعا قبول ہو گئی۔
افشاں قریشی نے کہا کہ مجھ سے اس وقت ایک غلطی یہ ہوگئی کہ مجھے یہ بھی لکھنا چاہیے تھا کہ اللہ اسے اچھا بیٹا بنائے اور اچھا انسان بھی بنائے۔
اب ان کا یہ بیان سوشل میڈیا پر وائرل ہوگیا۔
View this post on Instagram
انسٹاگرام پر ’دیوا میگزین پاکستان‘ نامی پیج نے اس خبر کو شیئر کیا جس پر افشاں قریشی نے ردِعمل دیتے ہوئے لکھا کہ آپ لوگ جھوٹی خبریں پھیلانے سے باز نہ آنا، برائے مہربانی میرے اور میری فیملی سے متعلق ایسی خبریں نہ پھیلائیں، ویوز اورکمنٹس حاصل کرنے کے لیے ان گھٹیا طریقوں کو استعمال کرنا چھوڑ دیں۔
افشاں قریشی کے اس کمنٹ کا اسکرین شاٹ اداکار فیصل قریشی نے اپنی انسٹا اسٹوری پر شیئر کرتے ہوئے دلچسپ تبصرہ کیا۔ اداکار کا کہنا تھا کہ ’ارے ساری اسپائس ہی ختم کردی ہماری امّاں نے اب لوگ کیا کریں گے‘۔
افشاں قریشی اور فیصل قریشی کی جانب سے جاری کیے گئے بیانات نے ماں بیٹے کے درمیان ہونے والی ممکنہ لڑائی کی خبروں کی تردید کردی ہے۔
