بہاولنگرمیں خاتون سے اجتماعی زیادتی کی پنجاب اسمبلی میں گونج، اصل معاملہ کیا ہے؟

پنجاب کے علاقے بہاولنگر میں شادی شدہ خاتون کو اجتماعی زیادتی کا نشانہ بنائے جانے کا معاملہ پنجاب اسمبلی میں پہنچ گیا۔

10 مئی کو تھانہ بہاولنگر کی حددو میں ایک شادی شدہ خاتون کو زیادتی کا نشانہ بنایا گیا تھا۔

متاثرہ خاتون کے مطابق اس کا قریبی رشتے دار جو ریسکیو میں ملازمت کرتا ہے وہ دوائی دلانے کے بہانے گھر سے لے گیا تھا، ملزم عمران نامی شخص نے بے ہوشی کا انجکشن لگایا اور 2 دن تک قید میں رکھا جبکہ اس دوران 9 افراد نے متعدد بار زیادتی کا نشانہ بنایا۔

خاتون نے بتایا کہ وہ موقع ملتے ہی وہاں سے فرارہوگئی، پولیس نے خاتون کی مدعیت میں مقدمہ بھی درج کر لیا تھا۔

خاتون کے ساتھ زیادتی پر پنجاب اسمبلی میں توجہ دلاؤ نوٹس

اپوزیشن رکن رانا آفتاب نے ایوان میں بہاولنگر تھانہ صدر کی حدود میں 9 افراد کی شادی شدہ خاتون سے اجتماعی زیادتی پر توجہ دلاؤنوٹس پیش کیا جس کا جواب دیتے ہوئے صوبائی وزیر برائے پارلیمانی امور مجتبیٰ شجاع الرحمٰن نے کہاکہ خاتون کے ساتھ زیادتی کا واقعہ پیش آیا جس میں اسے نشہ آور ادویات دے کر بے ہوش کرکے زیادتی کی گئی۔

انہوں نے کہاکہ پولیس نے چند ملزمان کو گرفتار کرلیا ہے جبکہ دیگر ملزمان عبوری ضمانت پر ہیں اور مقدمے کی تفتیش جاری ہے۔

مجتبیٰ شجاع نے کہاکہ خاتون کا میڈیکل کروا کر سیمپل فرانزک اتھارٹی کو بھجوائے گئے ہیں، میرٹ پر تفتیش کرتے ہوئے معاملے کو یکسو کیا جائے گا۔