وزیراعلیٰ خیبرپختونخوا علی امین گنڈاپور نے کہا ہے کہ صوبائی حکومت صحت کارڈ کو مزید وسعت دے رہی ہے اور صحت کارڈ کے ذریعے مفت علاج کے لیے فنڈز کی حد کو 10 لاکھ روپے سے بڑھا کر 20 لاکھ روپے کیا جائے گا۔
مزید پڑھیں
پشاور میں ایک تقریب سے خطاب کرتے ہوئے انہوں نے کہا کہ اس ہیلتھ کارڈ کے ذریعے خیبرپختونخوا کے شہری اپنے صوبے ہی نہیں بلکہ پاکستان بھر میں منظورشدہ اسپتالوں سے اپنا مفت علاج کروا سکیں گے۔ انہوں نے کہا کہ صوبائی حکومت سرکاری اسپتالوں میں صحت کی سہولیات کو بھی بہتر کرنا چاہتی ہے۔
وزیراعلیٰ کا مزید کہنا تھا کہ خیبرپختونخوا میں امن و امان کے مسائل ہیں اور یہ حکومت کے لیے ایک بڑا چیلنج ہے۔ انہوں نے کہا کہ امن و امان کی صورتحال کو بہتر بنانے کا واحد حل اپنے علاقوں کی ترقی ہے۔
انہوں نے کہا کہ امن و امان کو بہتر کرنے کے لیے لوگوں کو روزگار کے مواقع فراہم کرنا ہوں گے۔ وزیراعلیٰ خیبرپختونخوا نے کہا کہ صوبائی حکومت امن و امان کے مسئلے کو حل کرنے کے لیے عزم و استقامت کے ساتھ کام کررہی ہے۔
وزیراعلیٰ علی امین گنڈاپور کا کہنا تھا کہ اس مقصد کو پانے کے لیے حکومت کو عوام اور مختلف اداروں اور تنظیموں کی حمایت درکار ہے، دہشتگردی کے خاتمے کے لیے پاکستانی فورسز کے جوانوں نے بیش بہا قربانیاں دی ہیں۔
انہوں نے امید ظاہر کی کہ مستقبل قریب میں وہ دہشتگردی کا خاتمہ کرنے میں کامیاب ہوجائیں گے لیکن اس کے لیے ان کی توجہ علاقوں کی ترقی اور لوگوں کو روزگار کے مواقع کی فراہمی پر ہے۔
