سینیئر صحافی و اینکر پرسن منصور علی خان کا کہنا ہے کہ آج ملک جس مقام پر کھڑا ہے اس میں جوڈیشل ایکٹوازم کا بھی اہم کردار ہے۔ آج سیاسی جماعتیں عدالتی فیصلوں کی بجائے عوامی فیصلوں میں مقبول ہونے کی کوششوں میں مصروف ہیں۔
ایک سوال کے جواب میں ان کا کہنا تھا کہ عمران خان کی مقبولیت میں اسٹیبلشمنٹ، میڈیا اور عدلیہ نے اپنا اپنا حصہ ڈالا۔
ان کا کہنا تھا کہ اس ملک کو ہمیشہ سے عوام کے چنے ہوئے حکمرانوں کی بجائے کسی اور کے من پسند حکمران ملتے رہے ہیں اور یہ سلسلہ آج تک جاری ہے۔
ان کا مزید کہنا تھا کہ عمران خان کے بارے میں کوئی حتمی رائے نہیں دی جا سکتی، کہتے ہیں کہ جیل بہت کچھ سکھا دیتی ہے لیکن عمران خان کے بارے میں آپ کچھ بھی حتمی طور پر نہیں کہہ سکتے۔
ان کا کہنا تھا کہ موجودہ آرمی چیف ’ بلیک اینڈ وائٹ ‘ میں فیصلے کرتے ہیں وہ گرے ایریا کی طرف نہیں جاتے۔
ایک سوال کے جواب میں ان کا کہنا تھا کہ مریم نواز پولیس کے کپڑے پہننے کی بجائے پولیس ریفارمز کریں تو عوام میں مقبولیت حاصل کر سکتی ہیں ورنہ ماضی کی طرح بڑے میاں صاحب نے کوئی غلطی کی تو عمران خان اقتدار کے دروازے پر ہوں گے۔
انہوں نے کہا کہ میرے خیال میں مسلم لیگ ن بوڑھی ہو چکی ہے، ان کو سمجھ ہی نہیں آرہی کہ موجودہ ٹرینڈز کیا ہیں۔ تفصیلی انٹرویو کے لیے درج ذیل لنک کلک کریں۔
