سری لنکا میں قید 43 پاکستانیوں کے اہل خانہ کے لیے خوشخبری ہے سری لنکا نے قیدیوں کو پاکستان بھیجنے پر آمادگی ظاہر کردی ہے۔
جمعے کے روز وفاقی وزیرداخلہ محسن نقوی سے سری لنکا کے ہائی کمشنر ایڈمرل (ر) رویندرا چندرا سری وجے گونارتنے نے ملاقات کی، ملاقات میں دونوں رہنماؤں نے سری لنکا میں قید پاکستانی قیدیوں کی وطن واپسی کے حوالے سے تبادلہ خیال کیا اور قیدیوں کی فوری وطن واپسی پر اتفاق کیا۔
اس موقع پر باہمی دلچسپی کے امور اور دوطرفہ تعلقات کے فروغ پر بھی تبادلہ خیال کیا گیا، ملاقات میں سیکیورٹی اور انسداد منشیات کے سلسلے میں تعاون بڑھانے پر بھی اتفاق ہوا۔
وزیر داخلہ محسن نقوی نے اس حوالے سے کہا ہے کہ وزارت داخلہ ان قیدیوں کو واپس لانے کے لیے گزشتہ ایک ماہ سے سری لنکن حکام کے ساتھ بات چیت کررہی تھی، سری لنکا میں پاکستانی قیدیوں کی وطن واپسی کے انتظامات کو چند روز میں حتمی شکل دے دی جائے گی۔
اسلام آباد۔وفاقی وزیرداخلہ محسن نقوی کی ایک اور محاذ پر
کامیابیسری لنکا میں قید 43 پاکستانی قیدی وطن واپس آئیں گے
وفاقی وزیر داخلہ محسن نقوی سے سری لنکا کے ہائی کمشنر ایڈمرل (ر) رویندرا چندرا سری وجے گونارتنے کی ملاقات
ملاقات میں سری لنکا میں قید 43 پاکستانی شہریوں کی… pic.twitter.com/dxf4L5lyuN
— PTV News (@PTVNewsOfficial) May 24, 2024
انہوں نے کہا کہ سری لنکا اور پاکستان کے درمیان تعلقات گزشتہ 7 دہائیوں میں مضبوط سے مضبوط تر ہوتے جارہے ہیں، پاکستان سری لنکا کے ساتھ باہمی تعلقات کو مختلف شعبوں میں مزید آگے بڑھانے کا خواہاں ہے۔
سری لنکن ہائی کمشنر کی وزیرداخلہ محسن نقوی سے ملاقات کے موقع پر وفاقی سیکریٹری داخلہ خرم علی آغا، چئیرمین نادرا لیفٹیننٹ جنرل محمد منیر افسر اور متعلقہ افسران کے علاوہ سری لنکن ہائی کمشن کے دیگر حکام بھی موجود تھے۔