انٹرنیشنل کرکٹ کونسل (آئی سی سی) ٹی20 ورلڈکپ 2024 کی افتتاحی تقریب آج نیویارک میں ہوگی، میگا ایونٹ کا پہلا میچ کل صبح ساڑھے پانچ بجے امریکا اور کینیڈا کی ٹیموں کے درمیان ڈیلاس میں کھیلا جائے گا۔ ایونٹ کے دوسرے میچ میں ویسٹ انڈیز اور پاپوا نیوگنی کی ٹیمیں شام ساڑھے 7 بجے گیانا میں مدمقابل ہوں گی۔
ٹی 20ورلڈکپ کا تیسرا میچ نمیبیا اور عمان کے درمیان بارباڈوس میں 2 جون کو ہی کھیلا جائے گا، 3 جون کو 2 میچز کھیلیں جائیں گے، پہلے میچ میں سری لنکا، جنوبی افریقا اور دوسرے میچ میں افغانستان، یوگنڈا مدمقابل ہوں گے۔
دوسری جانب پاکستانی ٹیم لندن سے امریکی شہر ڈیلاس پہنچ چکی ہے، جہاں وہ 6 جون کو اپنا افتتاحی میچ میزبان امریکا کے خلاف کھیلے گی، جب کہ پاکستان کا دوسرا میچ اور میگا ایونٹ کا سب سے بڑا پاک بھارت ٹاکرا 9 جون کو نیویارک میں ہوگا۔
مزید پڑھیں
آئی سی سی مینز ٹی20 ورلڈ کپ کا 9واں ایڈیشن امریکا اور ویسٹ انڈیز کی مشترکہ میزبانی میں یکم جون سے 29 جون تک جاری رہے گا جس میں پہلی بار 20 ٹیمیں شرکت کررہی ہیں۔ ٹیموں کو 5،5 کے 4 گروپس میں تقسیم کیا گیا ہے، جب کہ ہر ٹیم ابتدائی گروپ مرحلے میں 4،4 میچز کھیلے گی، ہر گروپ سے سرفہرست 2 ٹیمیں سپرایٹ میں پہنچ جائیں گی۔
سپر 8 مرحلے کو مزید 2 گروپوں میں تقسیم کیا گیا ہے، جہاں تمام ٹیموں کو سیمی فائنل تک رسائی حاصل کرنے کے لیے 3،3 میچز کھیلنا ہوں گے اور ہر گروپ کی 2 سرفہرست ٹیموں کے درمیان سیمی فائنل کھیلا جائے گا، جس کے بعد 2 ٹیمیں 29 جون کو بارباڈوس میں ٹرافی کی آخری جنگ لڑیں گی۔
گروپ اے: بھارت، پاکستان، آئرلینڈ، کینیڈا، امریکا
گروپ بی: انگلینڈ، آسٹریلیا، نمیبیا، سکاٹ لینڈ، عمان
گروپ سی: نیوزی لینڈ، ویسٹ انڈیز، افغانستان، یوگنڈا، پاپوا نیو گنی
گروپ ڈی: جنوبی افریقہ، سری لنکا، بنگلہ دیش، نیدرلینڈز، نیپال
پاکستان کا ٹی20 ورلڈکپ شیڈول
6 جون: پاکستان بمقابلہ امریکا، ڈیلاس
9 جون: پاکستان بمقابلہ بھارت، نیویارک
11 جون: پاکستان بمقابلہ کینیڈا، نیویارک
16 جون: پاکستان بمقابلہ آئرلینڈ، لاڈر ہل
