قومی کرکٹر اعظم خان جو سوشل میڈیا پر اپنی ویڈیوز اور تصاویر اپلوڈ کرنے کے لیے مشہور تھے، انہوں نے اچانک فوٹو اینڈ ویڈیو شیئرنگ ایپ انسٹاگرام سے اپنی تمام تصاویر اور ویڈیوز ڈیلیٹ کردیں۔
واضح رہے کہ گزشتہ چند دنوں سے اعظم خان کے فٹنس مسائل پر شائقین کی جانب سے انہیں شدید تنقید کا نشانہ بنایا جارہا تھا۔ خاص طور پر انگلینڈ کے خلاف خراب کارکردگی کی بنا پر انہیں صارفین کی جانب سے آڑے ہاتھوں لیا گیا تھا۔
قومی ٹیم کی ہار پر پاکستانی شائقین ناراض تھے اور ٹیم سلیکشن پر بھی سوالات اٹھاتے نظر آرہے تھے، صارفین کی ایک بڑی تعداد اعظم خان کو تنقید کا نشانہ بناتی نظر آئی جن کا کہنا تھا کہ انہوں نے بہت بُری وکٹ کیپنگ کی۔
تاہم یہ واضح نہیں ہوسکا کہ اعظم خان نے اسی تنقید کی وجہ سے تمام پوسٹس ہٹائی ہیں یا وجہ کوئی اور ہے۔ انسٹا گرام اکاؤنٹ پر اعظم خان کی اب کوئی تصویر یا ویڈیو دستیاب نہیں ہے۔
یاد رہے پاکستان اور انگلینڈ کے درمیان 4 میچوں کی ٹی20 سیریز کھیلی گئی، 2 میچ بارش کی وجہ سے متاثر ہوئے جبکہ 2 میچوں میں انگلینڈ نے پاکستان کو شکست دے کر سیریز اپنے نام کی تھی۔
