میں نے آدھے گھنٹے سے کچھ نہیں لکھا، چیف جسٹس ’کہیں آپ کا قلم خشک نہ ہو جائے، وکیل‘

انصاف کے ترازو میں کچھ تولا جائے گا یا بغیر رکھے ہی تُل چکا؟ یہ بہت نامناسب ہے، پہلے مدعی موقف بیان کرے سوالات بعد میں، کینیڈا کی عدالت میں تو مقدمہ ایک گھنٹے میں ختم ہوجاتا ہے، سپریم کورٹ میں ججز کے درمیان نوک جھونک ہوئی ہے۔

سپریم کورٹ میں مخصوص نشستوں کے حوالے سے سنی اتحاد کونسل کی درخواست پر سماعت کے دوران چیف جسٹس قاضی فائز عیسٰی آج بینچ میں موجود دوسرے جج صاحبان کے متواتر سوالات سے قدرے خفا نظر آئے اور کہتے رہے کہ وکیل صاحب کو دلائل مکمل کرنے دیے جائیں۔

جسٹس منیب اختر چیف جسٹس سے خفا کیوں ہوئے؟

ایک موقع پر چیف جسٹس نے ازراہ تفنن کہاکہ ایک دفعہ میں ایک بینچ کے سامنے پیش ہوا تو میں نے ان سے کہاکہ اگر جج صاحبان نے فیصلہ کرلیا ہے تو میں دلائل نہیں دیتا، انہوں نے وکیل فیصل صدیقی کو مخاطب کرتے ہوئے کہاکہ آپ دلائل دے دیں ہم فیصلہ کرلیں گے، جس پر جسٹس منیب اختر خاصے خفا ہوئے اور کہاکہ یہ بہت نامناسب بیان ہے، یہ فل کورٹ ہے اور ہر جج کو سوالات پوچھنے کا حق حاصل ہے جو بھی وہ پوچھنا چاہیں، اور ایسی کوئی بات نہیں ہونی چاہیے کہ فیصلہ پہلے ہی سے کرلیا گیا ہے، یہ مناسب بیان نہیں ہے اور میں اسے قبول نہیں کرتا۔

جسٹس منصور علی شاہ نے کہاکہ حال ہی میں، میں نے کینیڈا میں سپریم کورٹ کی کارروائی دیکھی، وہاں ٹائمر لگا ہوتا ہے، ایک گھنٹے میں وکیل اپنے دلائل مکمل کرتا ہے اور ساتھ میں ججز کے سوالات بھی مکمل ہو جاتے ہیں، جس پر جسٹس جمال خان مندوخیل نے کہاکہ ہمارے وکیلوں کو شاید کینیڈا میں تربیت کی ضرورت ہے۔

جسٹس منصور علی شاہ نے کہاکہ الیکشن کمیشن آف پاکستان سے غلطی ہوئی، اس نے آزاد امیدواروں کی سنی اتحاد کونسل میں شمولیت کو تسلیم کیا اور بعد میں کہاکہ سنی اتحاد کونسل نے تو مخصوص نشستیں اپلائی ہی نہیں کیں، اب الیکشن کمیشن آف پاکستان اپنی غلطی سدھارتے ہوئے آزاد امیدواروں کو ایک ایسی جماعت میں شمولیت کا موقع دیتا جس نے مخصوص نشستیں اپلائی کررکھی تھیں۔

جسٹس اطہر من اللہ کا جسٹس منصور علی شاہ سے اتفاق

اس پر جسٹس اطہر من اللہ نے اتفاق کرتے ہوئے کہاکہ الیکشن کمیشن کی غلطی کی وجہ سے لوگوں کو ان کے حق رائے دہی سے محروم نہیں کیا جاسکتا۔

جسٹس جمال خان مندوخیل نے کہاکہ آزاد امیدواروں کے پاکستان تحریک انصاف میں شمولیت پر کوئی پابندی نہیں تھی، وہ لوگ وہاں کیوں نہیں گئے۔ انہوں نے کہاکہ بلے کے نشان کے فیصلے کو پڑھے اور سمجھے بغیر ہوا بنا کر لوگوں کو گمراہ کیا گیا، یہاں تک کہ پارٹی کے اپنے لوگ بھی مس گائیڈ ہوگئے جو کہ انہیں نہیں ہونا چاہیے تھا۔

اس موقع پر فیصل صدیقی نے وضاحت کرنے کی کوشش کی کہ آزاد امیدواران پاکستان تحریک انصاف میں شامل کیوں نہ ہوئے اور سنی اتحاد کونسل میں کیوں شامل ہوئے لیکن چیف جسٹس نے انہیں یہ کہتے ہوئے روک دیا کہ آپ پاکستان تحریک انصاف کی نمائندگی نہیں کرسکتے اور میں نے آدھے گھنٹے سے کچھ نہیں لکھا۔