پاکستانی کرکٹ ٹیم ٹی 20 ورلڈ کپ 2024 میں شرکت کے لیے امریکا میں موجود ہے، جہاں وہ امریکا کے خلاف اپنے میچ سے آج اس ایونٹ کا آغاز کرے گی، تاہم اس میچ سے قبل سوشل میڈیا صارفین کی جانب سے پاکستان کرکٹ بورڈ اور کرکٹ ٹیم کو تنقید کا سامنا ہے۔
مزید پڑھیں
سوشل میڈیا پر امریکا کے شہر ڈیلاس میں ہونے والی ایک تقریب کا دعوت نامہ گردش کر رہا ہے، جو سوشل میڈیا صارفین میں موضوع بحث بن گیا ہے۔
پاکستان کرکٹ ٹیم میٹ اینڈ گریٹ کے نام سے دعوت نامے پر لکھا گیا ہے کہ اگر آپ اس ایونٹ میں شرکت کرنا چاہتے ہیں تو آپ کو فی کس 25 ڈالر ادا کرنے ہوں گے۔
پی سی بی نے اس دعوت نامے کی تصدیق کرتے ہوئے کہا ہے کہ ایونٹ ایک چیریٹی فنکشن تھا، تاہم دعوت نامے میں کہیں بھی خیراتی کام کا ذکر نہیں ہے۔
سابق کپتان راشد لطیف نے اس حوالے سے کہا ہے کہ کھلاڑی آٹوگراف پر دستخط کرنے اور تصاویر لینے کے لیے پیسے لے رہے ہیں، ورلڈ کپ سے عین قبل نجی عشائیے میں کھلاڑیوں کا شرکت کرنا تباہ کن ہے۔
Let’s Save The Star & Be Stars
Unofficial Private Dinner During WC24#T20WorldCup pic.twitter.com/BXEgPyA2p2— Rashid Latif | 🇵🇰 (@iRashidLatif68) June 4, 2024
راشد لطیف نے کہا کہ اگر آئی سی سی یا پی سی بی نے اس عشائیے کا اہتمام کیا ہوتا تو بات الگ ہوتی، جب امریکا میں کسی نے پاکستانی کھلاڑیوں کو مدعو کیا تو ان سے پوچھا گیا کہ وہ کتنا معاوضہ دیں گے، ماضی میں ایسا بھی ہوا کہ تجارتی معاملات شہ سرخیوں میں آئے۔
انہوں نے کہا کھلاڑیوں کو فنڈز ریزنگ ایونٹ یا پرائیویٹ ڈنرز میں شامل نہیں ہونا چاہیے تھا، قومی کھلاڑیوں کو صرف کرکٹ پر توجہ مرکوز کرنی چاہیے۔
اس حوالے سے پاکستان کرکٹ بورڈ کے ترجمان نے دعویٰ کیا ہے کہ پاکستان کرکٹ ٹیم نے ڈیلاس میں ایک چیریٹی ایونٹ میں شرکت کی تھی، اس سے حاصل ہونے والی آمدنی ایک اچھے مقصد پر خرچ ہوگی، ایک بھی پاکستانی کھلاڑی کو شرکت کے لیے ادائیگی نہیں کی گئی۔
یاد رہے کہ اس نجی تقریب میں کپتان بابر اعظم اور محمد رضوان نے بھی شرکت کی تھی، پی سی بی نے انہیں تقریب میں جانے کی اجازت دی تھی۔
