گورنر سندھ کامران ٹیسوری نے کہا ہے کہ منافع خوروں نے رمضان المبارک میں ہر چیز مہنگی کر دی ہے، مارکیٹ میں ہر چیز مقررہ نرخ سے دوگنی قیمت پر مل رہی ہے۔ کسی میں خوفِ خدا نہیں، دل پتھر ہو گیا ہے۔ تمام ادارے مل کر مہنگائی مافیا کے خلاف سخت اقدامات کریں۔
کراچی میں میڈیا سے گفتگو کرتے ہوئے گورنر سندھ کامران ٹیسوری نے کہا کہ تمام ادارے مل کر ناجائر منافع خوروں کے خلاف کارروائی کریں۔ رمضان المبارک میں مارکیٹ میں ہر چیز مقررہ ریٹ سے دوگنی قیمت پر مل رہی ہے۔
گورنر سندھ نے مہنگائی مافیا کے خلاف کارروائی کی ہدایت کرتے ہوئے کہا کہ سندھ کے ہر ضلعی انتظامیہ کو وارننگ دے رہا ہوں کہ مارکیٹ کی نگرانی کریں۔ ’کمشنرز ، ڈپٹی کمشنرز دفتروں سے نکل کر عوام کے پاس جائیں ۔ تمام ادارے مل کر مہنگائی مافیا کے خلاف اقدامات کریں۔‘
انھوں نے عوام سے اپیل کی ہے کہ ناجائز منافع خوروں سے اشیاء نہ خریدیں۔ عوام منافع خوروں کی حوصلہ شکنی کے لیے مارکیٹ میں دوگنی قیمت میں اشیاء کی خریداری کا بائیکاٹ کریں۔
’بچت اور رمضان بازار میں میڈیا منافع خوروں کو سامنے لائے۔ میں بھی روزانہ کی بنیاد پر رمضان مارکیٹوں کا دورہ کروں گا۔‘
کامران ٹیسوری نے کہا کہ لوگ مجبور ہیں ان کی مجبوریوں سے نہ کھیلیں۔ شہر قائد کے لوگوں کے ساتھ ظلم ہو رہا ہے۔ ’فروٹ والوں کے پاس گیا تو کیلا 300روپے درجن فروخت ہو رہا تھا ، آلو کا ریٹ 35روپے فی کلو ہے جبکہ منافع خور 70روپے کلو آلو بیچ رہے ہیں۔‘
گورنر سندھ نے کہا کہ کب تک ملک میں یہ ڈرامہ لگا رہے گا۔ مہنگائی کم کرنے پر پوری مشینری لگتی ہے۔ لوگوں سے کھلواڑ اور مذاق بند کیا جائے۔ ’لوگوں کو منافع خوروں کے رحم و کرم پر چھوڑنا تھا تو نرخوں کی فہرست بنانے کی کیا ضرورت تھی۔‘
