وزیرِ اعظم پاکستان شہباز شریف چین کا 5 روزہ دورہ مکمل کرکے پاکستان واپس پہنچ گئے۔
وزیرِ اعظم شہباز شریف کا 5 روزہ دورہ چین پاکستان اور چین کے تعلقات کی مضبوطی، دونوں ممالک کے مابین تجارتی تعلقات و اسٹریٹجک شراکت داری اور سی پیک کے دوسرے مرحلے کے آغاز کے حوالے سے اہم سنگ میل ثابت ہوا۔
مزید پڑھیں
چین سے واپس روانگی سے قبل وزیراعظم شہباز شریف نے کہاکہ حالیہ دورہ پاکستان اور چین کے دو طرفہ تعلقات میں ایک نئی جہت کا اضافہ ہے۔
انہوں نے کہاکہ چینی قیادت، شی جن پنگ اور پریمئیر لی چیانگ کا مہمان نوازی پر دل سے مشکور ہوں، پاکستان اور چین کی دوستی لازوال اور بے مثال ہے۔
وزیراعظم نے کہاکہ سی پیک کے دوسرے مرحلے کے تحت چینی کاروباری شخصیات و سرمایہ کاروں کی پاکستانی کاروباری شخصیات اور سرمایہ کاروں سے ملاقات ہوئی۔
انہوں نے کہاکہ چین کی انفارمیشن ٹیکنالوجی، زراعت، معدنیات و دیگر شعبوں میں ترقی قابل تقلید ہے، چین اور پاکستان کی اقتصادی شراکت داری سے دونوں ممالک کے عوام مستفید ہوں گے۔
وزیراعظم نے مزید کہاکہ حالیہ دورہ چین کے دوران ہونے والی مثبت پیشرفت کے اثرات طویل مدت تک قائم رہیں گے۔
پاکستان روانہ ہوتے وقت شانشی صوبے کے نائب گورنر چَھن چُھنجیانگ سمیت اعلیٰ چینی و پاکستانی سفارتی اہلکاروں نے وزیراعظم کو الوادع کیا۔
