وفاقی وزیر منصوبہ بندی احسن اقبال نے کہا ہے کہ حکومت اپنی مدت پوری کرے گی اور ہم ایک مضبوط معاشی بنیاد دے کر جائیں گے۔
نجی ٹی وی کے پروگرام میں گفتگو کرتے ہوئے احسن اقبال نے کہاکہ قومی اقتصادی کونسل کا اجلاس انتہائی خوشگوار ماحول میں ہوا جس میں چاروں صوبوں کے وزرائے اعلیٰ نے شرکت کی۔
انہوں نے کہاکہ علی امین گنڈاپور نے اپنے صوبے سے متعلق کچھ باتیں بتائیں، قومی اقتصادی کونسل آئین کے مطابق معاشی فیصلہ سازی کے لیے ایپکس باڈی ہے۔
مزید پڑھیں
انہوں نے کہاکہ ملکی معیشت کی ترقی کے لیے ضروری ہے کہ اب ملک میں کوئی غیریقینی صورتحال پیدا نہ ہو۔ ہمیں بحیثیت پاکستانی فیصلہ کرنا ہے کہ 2047 میں ہم کہاں کھڑے ہوں گے۔
احسن اقبال نے کہاکہ ہم سی پیک کے دوسرے فیز میں داخل ہورہے ہیں اور دشمن قوتوں کی سازش ہے کہ اسے سبوتاژ کیا جائے مگر چین نے واضح کیا ہے کہ دشمن قوتیں اپنے مقاصد میں کامیاب نہیں ہوں گی۔
انہوں نے کہاکہ چین اپنے لوگوں کی زندگیوں کے معاملے میں بہت حساس ہے، کیونکہ چینی باشندوں کی جانوں کے نقصان پر چینی قیادت کے لیے اہم ایشو ہوتا ہے۔
وفاقی وزیر نے کہاکہ پاکستان میں بدقسمتی سے بڑے ٹارگٹڈ واقعات ہوئے، اور حالیہ واقعات میں ملوث قوتوں کی خواہش تھی کہ پاکستان اور چین کے تعلقات کو سبوتاژ کیا جائے۔
چینی قیادت کو سیکیورٹی کے اضافی اقدامات سے متعلق آگاہ کیا
انہوں نے کہاکہ ہم نے حالیہ دورے کے دوران چینی قیادت کو سیکیورٹی کے اضافی اقدامات سے متعلق آگاہ کیا جس پر انہوں نے اطمینان کا اظہار کیا۔
احسن اقبال نے کہاکہ چین اور پاکستان مل کر افغانستان پر دباؤ بڑھائیں گے کہ وہ اپنی سرزمین کسی دوسرے ملک کے خلاف دہشتگردی کے لیے استعمال نہ ہونے دے۔
ہمسایوں کے ساتھ اچھے تعلقات ہونے چاہییں
ایک سوال کے جواب میں انہوں نے کہاکہ خطے کی ترقی کے لیے ہمسایوں کے ساتھ اچھے تعلقات ہونے چاہییں، نواز شریف کا یہی موقف ہے کہ پاکستان اور بھارت بات چیت سے تنازعات کو حل کریں۔
انہوں نے کہاکہ نواز شریف کا اعلان لاہور بڑا ہائی پوائنٹ تھا جب واجپائی لاہور آئے، لیکن کارگل کے واقعات نے امن کی کوششوں کو دھچکا لگایا۔
