بکرا عید کے دن جوں جوں قریب آرہے ہیں ویسے ہی کراچی کی گلیوں میں ایک سے بڑھ کر ایک جانور لایا جا رہا ہے، خریدنے والے خدمت میں جت چکے ہیں جبکہ تماشائی بھی بڑھتے جا رہے ہیں جن میں کچھ خوبصورت جانور دیکھنے کا شوق رکھتے ہیں جبکہ کچھ ایسے بھی ہیں جنہوں نے ابھی منڈی جانا ہے لیکن قیمتوں کا اندازا لگانے وہ نا صرف ہر جانور دیکھ رہے ہیں بلکہ قیمت بھی دریافت کرتے ہیں۔
کراچی کے علاقہ ناظم آباد میں ایک ایسا خاندان ہے جو ہر سال 3 بڑے جانور قربان کرنے کے لیے مشہور ہے اس بار بھی یہ گھرانا ایک سے بڑھ کر ایک جانور لاچکا ہے اور ساتھ ہی ان کی خدمت بھی کی جا رہی ہے، ان 3 جانوروں کی قیمت ڈیڑھ کروڑ روپے بتائی جا رہی ہے۔
ان جانوروں کے مالک وقاص احمد کا دعویٰ ہے کہ ان جانوروں کا وزن تیس من سے زائد ہے اور ان کا شوق ہے جس کی وجہ سے ہر برس جانور عید سے بہت پہلے لائے جاتے ہیں ان کی خدمت کی جاتی ہے اور اس کے بعد عید کے 3 دن ایک ایک جانور قربان کیا جاتا ہے جس میں گھر کے افراد ہی شامل ہوتے ہیں قصائی کو نہیں بلایا جاتا، ان تینوں جانوروں کو روزانہ نہلایا جا رہا ہے تا کہ گرمی کی شدت سے انہیں بچایا جا سکے۔
