کوئٹہ کی مقامی عدالت نے عمران خان کے فوکل پرسن حسان نیازی کو ایک روزہ راہداری ریمانڈ پر پنجاب پولیس کے حوالے کردیا۔
اسلام آباد سے گرفتاری کے بعد ایک روزہ راہداری ریمانڈ پر کوئٹہ میں درج مقدمہ میں ضمانت کے بعد حسان نیازی کو کوئٹہ کے جوڈیشل مجسٹریٹ 7 کلیم اللہ موسیانی کی عدالت میں پیش کیا گیا۔
عدالت نے تحریک انصاف کے رہنما حسان نیازی کو لاہور میں درج ایک مقدمہ میں ایک روزہ راہداری ریمانڈ پر پنجاب پولیس کے حوالے کر دیا۔ جوڈیشل مجسٹریٹ نے ملزم کو چیمبر میں طلب کر کے راہداری ریمانڈ دیا۔
اس موقع پر حسان نیازی کے وکیل اقبال شاہ ایڈووکیٹ کی میڈیا سے گفتگو کرتے ہوئے کہا کہ کل حسان نیازی کی ضمانت ہوگئی تھی مگر اسے غیر قانونی طور پر جیل بھیجا گیا۔
’ہم نے مچلکے پیش کردیے تھے جیل کے گیٹ پر انتظار کرتے رہے مگر حسان کو رہا نہ کیا گیا۔جیل انتظامیہ گزشتہ روز حفاظتی ضمانت کا حکمنامہ لینے سے ٹال مٹول سے کام لے رہی تھی۔‘
اقبال شاہ کے مطابق جیل انتظامیہ کے پاس حسان نیازی کو رکھنے کا کوئی جواز نہیں تھا۔ ڈیڑھ دو بجے بد نیتی کا مظاہرہ کرتے ہوئے ایم پی او کے تحت قید میں رکھا گیا ہے۔
’پنجاب پولیس صبح سے عدالت آکر بیٹھی ہوئی ہے۔کس قانون کے تحت پنجاب پولیس حسان نیازی کی حوالگی مانگ رہی ہے۔ پی ٹی آئی کے کارکنوں کے خلاف اوچھے ہتھکنڈے استعمال کیے جارہے ہیں۔‘
واضح رہے کہ گذشتہ روز جوڈیشل مجسٹریٹ نے کوئٹہ کے ایئر پورٹ تھانے میں درج ہنگامہ آرائی کے مقدمہ میں حسان نیازی کی ضمانت منظور کرلی تھی۔ جس کے بعد ایم پی او کے تحت حسان نیازی کو دوبارہ گرفتار کرلیا گیا تھا۔
