وفاقی وزیر برائے مذہبی امور چوہدری سالک حسین نے کہا ہے کہ سعودی حکومت ہر سال حج انتظامات میں جدت اور نئی سہولیات متعارف کروا رہی ہے۔
وفاقی وزیر برائے مذہبی امور چوہدری سالک حسین نے وفد کے ہمراہ اپنے سعودی ہم منصب ڈاکٹر توفیق بن فوزان الربیعہ سے ملاقات کی ہے، اس موقع پر گفتگو میں چوہدری سالک حسین نے کہا کہ پاکستانی حجاج کی سہولت کے لیے سعودی وزیر حج کی خصوصی توجہ باعث مسرت ہے، سعودی حکومت حج انتظامات میں ہر سال جدت اور نئی سہولیات متعارف کروا رہی ہے۔
چوہدری سالک حسین نے کہا کہ سرکاری و نجی عازمین حج کے لیے سعودی مکاتب کی جانب سے بہترین سہولیات کی توقع رکھتے ہیں۔
نجی کمپنیوں کی حوصلہ افزائی کررہے ہیں، ڈاکٹر توفیق الربیعہ
اس موقع پر سعودی وزیر مذہبی امور ڈاکٹر توفیق الربیعہ نے یقین دلایا کہ منیٰ اور عرفات میں پاکستانی حج مشن کی تمام ضروریات کا خیال رکھا جائے گا اور ہر ممکن تعاون فراہم کیا جائے گا۔
انہوں نے مزید کہا کہ مشاعر مقدسہ میں بہتر سہولیات کو یقینی بنانے کے لیے نجی کمپنیوں کی حوصلہ افزائی کررہے ہیں۔
سرکاری و نجی حج سکیم کے لیے ون ونڈو کے ذریعے رابطہ استوار کریں گے
ڈاکٹر توفیق بن فوزان الربیعہ سے ملاقات کرنے والے وفد میں سیکریٹری مذہبی امور ذوالفقار حیدر، حافظ طاہر اشرفی، ڈی جی حج عبدالوہاب سومرو، اور ڈائریکٹر مکہ فہیم خان آفریدی شامل تھے۔
سیکریٹری مذہبی امور ذوالفقار حیدر نے اس موقع پر کہا کہ اگلے سال سرکاری و نجی حج سکیم کے لیے ون ونڈو کے ذریعے رابطہ استوار کریں گے۔
