کراچی میں اس بار ناردرن بائی پاس پر مرکزی مویشی منڈی کے علاوہ شہر کے اندر بھی بہت سی منڈیاں سجی ہیں، یہی وجہ ہے کہ آبادی کے درمیان مویشی منڈیوں میں مردوں کے ساتھ خواتین اور بچوں کا رش بھی دکھائی دے رہا ہے۔
کراچی کے علاقے ناظم آباد میں قائم مویشی منڈی میں جانور تو بہت ہیں لیکن خریدار قیمتوں سے پریشان دکھائی دے رہے ہیں، لیکن دلچسپ پہلو یہ ہے کہ خواتین کی دلچسپی اور بارگین نے خریدو فروخت کے روایتی طریقے کو پیچھے چھوڑ دیا ہے۔ کچھ خواتین کا کہنا ہے کہ وہ مردوں سے بہتر بارگین کر سکتی ہیں، جبکہ کچھ کا ماننا ہے کہ یہ کام مردوں ہی کو جچتا ہے، کیوں کہ یہ معاملہ عام چیزوں سے ہٹ کر ہے۔ اس کے باوجود خیال ہے کہ اگر شہر میں اسی طرح منڈیاں سجتی رہیں تو آئندہ چند برسوں میں قربانی کے جانور خریدنے والوں میں خواتین کی تعداد زیادہ ہوگی۔
