انٹرنیشنل کرکٹ کونسل (آئی سی سی) کی جانب سے جاری ٹی20 آل راؤنڈر رینکنگ میں افغانستان کے محمد نبی کی ٹاپ پوزیشن سے تین درجے تنزلی کے بعد چوتھے نمبر پر جبکہ آسٹریلیا کے مارکس اسٹوئنس شاندار کارکردگی کی بدولت دوسری پوزیشن سے ٹاپ پر پہنچ گئے ہیں۔
آسٹریلیا کے مارکس اسٹوئنس نے آئی سی سی مینز ٹی20 ورلڈ کپ کے سُپر8 مرحلے تک رسائی میں ٹیم کے لیے اہم کردار ادا کرتے ہوئے 6 وکٹیں حاصل کیں اور بلے سے بھی ٹیم کے لیے 3 یادگار اننگز کھیلیں۔
سری لنکا کے ونندو ہسارنگ اور بنگلا دیش کے شکیب الحسن ٹاپ تھری میں شامل ہیں جبکہ محمد نبی رینکنگ میں نیچے گر گئے ہیں لیکن پھر بھی چوتھے نمبر پر ہیں۔
اگرچہ ورلڈ کپ کے شریک میزبان ویسٹ انڈیز کی بیٹنگ پاور ان کے اسکواڈ کا خاصا ہے، لیکن یہ ان کے بولرز ہیں جنہوں نے ٹورنامنٹ میں اب تک سب سے زیادہ بہترین کارکردگی کا مظاہرہ کیا ہے۔ آئی سی سی ٹی20 باؤلنگ رینکنگ میں عقیل حسین 6 درجے ترقی کے ساتھ دوسرے نمبر پر پہنچ گئے ہیں۔ انگلینڈ کے عادل رشید بدستور پہلے نمبر پر موجود ہیں۔
مینز بیٹنگ رینکنگ میں ٹاپ 4 کھلاڑیوں کی رینکنگ برقرار ہے جس میں سوریہ کمار یادو، فل سالٹ، بابر اعظم اور محمد رضوان شامل ہیں۔ آسٹریلوی اوپنر ٹریوس ہیڈ 5 درجے ترقی کے ساتھ پانچویں جبکہ ویسٹ انڈیز کے نکولس پورن 8 درجہ ترقی سے 11 ویں نمبر پر ہیں۔
