پاکستان کی کرکٹ ٹیم نے ٹی ٹوئنٹی سیریز کے تیسرے اور آخری میچ میں افغانستان کو شکست دے دی اور وائٹ واش سے بچ گئی ہے۔
شارجہ میں کھیلے گئے میچ میں پاکستان نے پہلے بیٹنگ کرتے ہوئے مقررہ 20 اوورز میں 7وکٹوں کے نقصان پر 183 رنز بنائے تھے اور جواب میں افغانستان کی پوری ٹیم18.4اوورز میں116 رنز بناکرآؤٹ ہوگئی۔
سیریز کے آخری میچ میں افغان ٹیم کے کپتان راشد خان نے ٹاس جیت کر پاکستان کو پہلے بیٹنگ کی دعوت دی۔
پاکستان کی جانب سے صائم ایوب نے 40 گیندوں پر 49 رنز اسکور کیے، کپتان شاداب خان نے 17 بالز پر 28 رنز بنائے جبکہ افتخار احمد 31 ،عبداللہ شفیق 23 ،عماد وسیم 13 ،طیب طاہر 10 رنز بناسکے۔محمد نواز 5 اور محمد وسیم 9 رنز اسکور کرکے ناٹ آؤٹ رہے۔
افغانستان کی جانب سے مجیب الرحمان نے 2 کھلاڑیوں کو پویلین کی راہ دکھائی جبکہ محمد نبی ،راشد خان ، کریم جنت اور فضل الحق فاروقی نے ایک ایک کھلاڑی کو آؤٹ کیا۔
جواب میں افغانستان نے بیٹنگ کا آغاز کیا تو کوئی کھلاڑی وکٹ پر ٹک نہ کھیل سکا۔ رحمان اللہ گرباز 18 ،عثمان غازی 15 ،محمد نبی 17 ،صدیق اللہ 11 رنز بنا سکے۔
پاکستان کی جانب سے کپتان شاداب خان اور احسان اللہ نے 3،3 شکار کیے جبکہ محمد وسیم اور عماد وسیم نے ایک، ایک کھلاڑی کوآؤٹ کیا۔
واضح رہے کہ 3 میچوں کی ٹی ٹوئنٹی سیریز افغانستان پہلے ہی اپنے نام کر چکا ہے۔پاکستان کو پہلے دونوں میچوں میں شکست کا سامنا کرنا پڑا تھا۔
