بالی ووڈ کے معروف اداکار نوازالدین صدیقی نے خود کو ہندی فلم انڈسٹری کا ’بدصورت ترین‘ اداکار قرار دیا ہے۔
حال ہی میں ایک انٹرویو کے دوران انہوں نے انکشاف کیا کہ انہیں اپنی شکل کی وجہ سے انڈسٹری میں مسلسل طعنوں اور امتیازی سلوک کا سامنا رہا۔
یہ بھی پڑھیں: نوازالدین صدیقی نے اپنے بچوں کے باپ ہونے کا فرض نہیں نبھایا،اہلیہ کا دعویٰ
نوازالدین صدیقی کا کہنا تھا، ’ شوبز انڈسٹری میں خوبصورت چہروں کی ضرورت ہوتی ہے جبکہ میں بدصورت ہوں، مجھے یہ جملہ اتنی بار سننے کو ملا کہ مجھے خود بھی یقین ہوگیا کہ میری شکل بری ہے۔‘
اداکار نے مزید بتایا کہ آئینے میں دیکھ کر وہ خود سے بھی یہ سوال کرنے لگے تھے کہ وہ اتنی بری شکل لے کر فلم انڈسٹری میں کیوں آگئے۔ انہوں نے کہا کہ میں شروع سے یہ سب سنتا آرہا ہوں اور اب یہ ماننے بھی لگا ہوں۔
یہ بھی پڑھیں: جب بھی اچھے اسکرپٹ پر مبنی فلم ہو تو تینوں خانز مجھے فون کرتے ہیں،نوازالدین صدیقی
تاہم نوازالدین نے اپنے ناقدین کو آئینہ دکھاتے ہوئے کہا کہ وہ بالی ووڈ انڈسٹری کے شکرگزار ہیں جس کی بدولت ان کا کیریئر بنا اور انہیں مختلف کردار ادا کرنے کے مواقع ملے۔
انہوں نے کہا کہ معمولی شکل کے طعنوں اور امتیازی رویے کا جواب دینے کے لیے انہوں نے اداکاری پر محنت کی اور آج وہ جس مقام پر بھی ہیں اسی لگن اور محنت کی وجہ سے ہیں۔
یہ بھی پڑھیں: بالی ووڈ کے وہ بڑے نام جنہوں نے مشہور ہونے کے لیے اپنے اصل نام تبدیل کردیے
نوازالدین صدیقی بالی ووڈ کے ورسٹائل اداکار ہیں جو گینگز آف واسع پور، کہانی، لنچ باکس، بدلہ پور جیسی ہٹ فلموں اور مشہور ویب سیریز سیکرڈ گیمز میں اپنی اداکاری کا لوہا منوا چکے ہیں۔
وہ بھارتی فلم انڈسٹری میں امتیازی سلوک کے حوالے سے پہلے بھی کھل کر بات کرچکے ہیں اور ہمیشہ اپنے ناقدین کو اپنی جاندار اداکاری سے جواب دیتے آئے ہیں۔
