بھارتی کرکٹ ٹیم کے اسٹار بلے باز ویرات کوہلی کے بنگلورو میں واقع مشترکہ ملکیتی ون8 کمیون شراب خانے کے مینیجر کے خلاف مقدمہ درج کرلیا گیا ہے۔ پولیس کے مطابق شراب خانہ رات ایک بجے بندش کی ڈیڈ لائن کے بعد بھی صارفین کو خدمات فراہم کر رہا تھا۔
بنگلورو کے کیوبن پارک پولیس اسٹیشن میں درج ایف آئی آر میں کہا گیا ہے کہ ون8 کمیون پب کو رات 1 بج کر 20 منٹ پر خدمات فراہم کرتے ہوئے پایا گیا، جو مقررہ وقت سے 20 منٹ زیادہ تھا۔
مزید پڑھیں:ویرات کوہلی نے بھارت چھوڑنے کا فیصلہ کرلیا؟
پولیس رات گئے گشت پر تھی، جب اسے ون8 کمیون کھلا ہونے کی اطلاع ملی۔ پولیس سب انسپکٹر رات ایک بج کر 20 منٹ پر شراب خانے پہنچے تو وہاں گاہکوں کو خدمات فراہم کی جا رہی تھیں۔ مقررہ وقت کی خلاف ورزی پر ایف آئی آر درج کرلی گئی۔ پولیس کے مطابق 3 دوسرے شراب خانوں کے خلاف بھی کارروائی کی گئی ہے۔
مزید پڑھیں:ویرات کوہلی سے متعلق عمران خان کی پیشگوئی جو بالکل ٹھیک ثابت ہوئی
واضح رہے کہ ویرات کوہلی کے ملکیتی ون8 کمیون کی دہلی، ممبئی، پونے اور کولکتا جیسے بڑے شہروں میں شاخیں ہیں۔ بنگلورو برانچ گزشتہ برس دسمبر میں شروع کی گئی تھی، جو ایم چناسوامی اسٹیڈیم کے قریب رتنم کمپلیکس کی چھٹی منزل پر واقع ہے۔
