ملک میں مہنگائی کے ستائے عوام کو آئے روز کوئی ایسی خبر سننے کو ملتی ہے جو ان پر بجلی بن کر گرتی ہے، خصوصاً بجلی کی قیمتوں میں آئے روز اضافہ تو اب عام سے بات ہوگئی ہے، اور ہر شہری اس پریشانی کا شکار رہتا ہے کہ آئندہ ماہ اس کا بل کتنا آئے گا۔
وفاقی حکومت نے آج ایسا ہی ایک نوٹیفکیشن جاری کرتے ہوئے کراچی سمیت ملک بھر کے صارفین کے لیے بجلی مہنگی کرنے کی منظوری دے دی ہے۔
یہ بھی پڑھیں حکومت کا 200 یونٹ تک بجلی استعمال کرنے والوں کو ریلیف دینے کا اعلان
پاور ڈویژن کی جانب سے جاری کیے گئے نوٹیفکیشن کے مطابق گھریلو صارفین کے لیے بجلی کے بنیادی ٹیرف میں 7.12 روپے تک کا اضافہ کیا گیا ہے۔
نوٹیفکیشن کے مطابق ماہانہ 200 یونٹ تک بجلی استعمال کرنے والے گھریلو صارفین کو 3 ماہ کے لیے اضافے سے مستثنیٰ قرار دیا گیا ہے۔
نوٹیفکیشن میں کہا گیا ہے کہ ماہانہ 201 سے 300 یونٹ تک کا ٹیرف 7.12 روپے اضافے سے 34.26 روپے ہوگیا ہے جبکہ ماہانہ 301 سے 400 یونٹ کا ٹیرف 7.02 روپے اضافے سے 39.15 روپے ہوگیا۔
نوٹیفکیشن کے مطابق ماہانہ 401 سے 500 یونٹ تک بجلی استعمال کرنے والوں کا ٹیرف 6.12 روپے اضافے سے 41.36 روپے ہوگیا۔
اس کے علاوہ ماہانہ 501 سے 600 یونٹ کا ٹیرف 6.12 روپے اضافے سے 42.78 روپے کا ہوگیا ہے۔
نوٹیفکیشن کے مطابق ماہانہ 601 سے 700 یونٹ کا ٹیرف 6.12 روپے اضافے سے 43.92 روپے کا ہوگیا ہے۔ جبکہ 700 سے زیادہ یونٹس کے استعمال پر ٹیرف 6.12 روپے اضافے سے 48.84 روپے ہوگیا۔
نوٹیفکیشن کے مطابق ماہانہ 50 یونٹ تک استعمال کرنے والے لائف لائن صارفین کے لیے ایک یونٹ کی قیمت 3.95 روپے ہوگی، جبکہ 51 سے 100 یونٹ تک استعمال کرنے والوں کو فی یونٹ 7.74 روپے میں پڑے گا۔
یہ بھی پڑھیں بجلی کی قیمت 8 روپے فی یونٹ سے کم کیوں ہونی چاہیے، سابق وفاقی وزیر نے بتادیا؟
واضح رہے کہ نیپرا نے 11 جولائی کو بجلی کے فی یونٹ ٹیرف میں اضافے کی منظوری دی تھی اور اب حکومت کی جانب سے نوٹیفکیشن جاری کردیا گیا ہے۔
یہ بھی یاد رہے کہ عالمی مالیاتی ادارے آئی ایم ایف کی شرائط کے باعث حکومت نے بجلی کی قیمتوں میں ہوشربا اضافہ کیا ہے۔
