پاکستان پیپلزپارٹی نے تحریک انصاف پر پابندی لگانے کے حکومتی فیصلے پر کہا ہے کہ ان کو اس فیصلے پر اعتماد میں نہیں لیا گیا۔
پیپلزپارٹی کے سینیئر رہنما سید خورشید شاہ نے اپنے ایک بیان میں کہاکہ حکومت نے ہمیں اس فیصلے پر اعتماد میں نہیں لیا۔
یہ بھی پڑھیں حکومت کا پی ٹی آئی پر پابندی لگانے اور عمران خان پر آرٹیکل 6 کے تحت ریفرنس لانے کا فیصلہ
انہوں نے کہاکہ یہ عدالتوں کے فیصلے ہیں، اب دیکھتے ہیں عدالت کیا فیصلہ کرتی ہے۔
سیّد خورشید شاہ نے کہاکہ ہمیں سیاست کرنی چاہیے ان چیزوں سے مسئلے حل نہیں ہوں گے۔ اس وقت ملک کے جو حالات ہیں سب کو مل کر بیٹھنا چاہیے۔
واضح رہے کہ حکومت نے پاکستان تحریک انصاف پر پابندی لگانے کے علاوہ سابق صدر عارف علوی، عمران خان اور قاسم سوری کے خلاف آرٹیکل 6 کی کارروائی چلانے کا فیصلہ کیا ہے۔
یہ بھی پڑھیں حکومت پابندی لگانے کی آخری کوشش کرکے بھی دیکھ لے، پاکستان تحریک انصاف
وفاقی وزیر اطلاعات عطااللہ تارڑ نے اسلام آباد میں پریس کانفرنس سے خطاب کرتے ہوئے کہا کہ ’ملک کے ساتھ بہت کھلواڑ ہوچکا، اب کہنا چاہتے ہیں کہ ’نومور‘ ۔ ہم اس ملک کو آگے لے کر جانا چاہتے ہیں اور اس کے لیے ہم سمجھتے ہیں کہ کہ اگر اس ملک کو آگے لے کر جانا ہے تو پھر تحریک انصاف اور پاکستان ایک ساتھ نہیں چل سکتے۔