پاکستان کی معروف اداکارہ اور ٹی وی ہوسٹ عفت عمر نے اپنی بیٹی نور جہاں کی منگنی کی متعدد تصاویر جاری کی ہیں لیکن اپنے ہونے والے داماد کے بارے میں کچھ بھی نہ بتایا۔
عفت عمر کی جانب سے اپنے آفیشل انسٹاگرام ہینڈل پر پوسٹ کی گئی تصاویر میں ان کی بیٹی نورجہاں کو مغربی طرز کا لباس پہنے اور ان کے منگیتر کو پینٹ سوٹ میں ملبوس دیکھا جاسکتا ہے۔
یہ بھی پڑھیں: ’میں جیسے بھی کپڑے پہنوں لوگ کہنے والے کون ہوتے ہیں‘، عفت عمر
ان تصاویر میں اس نئے جوڑے کو رومانوی انداز سے پوز دیتے دکھایا گیا ہے۔ عفت عمر نے اپنے ہونے والے داماد اور اس کے والدین کے ساتھ تصاویر بھی شیئر کی ہیں جن میں دونوں خاندان کافی خوش نظر آرہے ہیں۔
عفت عمر کے ہونے والے داماد اسمارٹ اور ہینڈسم نوجوان ہیں۔ اداکارہ نے اپنی پوسٹ میں لڑکے کا نام اور دیگر تفصیلات شیئر نہیں کیں تاہم تصاویر سے صاف ظاہر ہورہا ہے کہ وہ پاکستانی نہیں۔
لڑکے کے والدین کو بھی دیکھ کر اندازہ لگایا جاسکتا ہے کہ نورجہاں کے سسرال کا تعلق کسی مغربی ملک سے ہے۔ اس کے علاوہ منگنی کی تصاویر سے اندازہ لگایا جاسکتا ہے کہ منگنی پاکستان سے باہر کسی ملک میں ہوئی ہے۔
اداکارہ نے اپنی پوسٹ کا کمنٹ سیکشن بند کردیا ہے تاہم تصاویر والی پوسٹ کے کیپشن میں انہوں نے لکھا، ’میری چھوٹی سی بیٹی کی منگنی ہوگئی ہے اور میں اب باضابطہ طور پر ساس بن گئی ہوں۔‘
عفت عمر نے اپنے انسٹاگرام پر بیٹی اور ہونے والے داماد کی ویڈیو بھی پوسٹ کی ہے جس میں ان دونوں کو مختلف پوز دیتے ہوئے دکھایا گیا ہے۔
عفت عمر نے اس پوسٹ کے کیپشن میں لکھا ’ان تمام لوگوں کا شکریہ، جو میری بیٹی کی منگنی کے لیے مبارکباد دے رہے ہیں اور نیک خواہشات کا اظہار کررہے ہیں۔‘
واضح رہے کہ عفت عمر کی بیٹی نورجہاں نے ایک سال قبل نیو یارک کی کارنیل یونیورسٹی سے گریجویشن کی ڈگری حاصل کی تھی۔
