’ارے! میرے بیوی بچے بھی ہیں‘۔ یہ بظاہر ملتجانہ جملہ ویسٹ انڈیز کے بلے باز کیوم ہوج نے اس وقت کہا جب وہ اپنی پہلی ٹیسٹ سینچری بنانے کو تھے، مگر عین موقع پر ان کا راستہ انگلینڈ کے باؤلر ووڈ کی طوفانی باؤلنگ نے روک رکھا تھا۔
اس بات کا انکشاف کیوم ہوج نے ناٹنگھم (انگلینڈ) میں کھیلے گئے، دوسرے ٹیسٹ میچ کے دوسرے روز کے کھیل کے اختتام پر پریس کانفرنس میں کیا۔
کیوم ہوج کے مطابق ایک لمحہ ایسا آیا جب مجھے لگا کہ میں 97 رنز ہی پر ڈھیر ہوجاؤں گا۔ کیوم ہوج نے ووڈ کی انتہائی تیز رفتار باؤلنگ کا ذکر کرتے ہوئے کہا کہ ایسا روز روز نہیں ہوتا کہ آپ کو کسی ایسے شخص کا سامنا کرنا پڑے جو ہر ایک گیند 90 میل فی گھنٹہ کی رفتار سے پھینک رہا ہو، میرے نزدیک یہ خاصا لرزہ خیز تھا۔
یہ خواب تو نہیں
واضح رہے کہ نوٹنگھم میں کھیلے گئے دوسرے ٹیسٹ کے دوسرے روز کے اختتام پر کیوم ہوج اپنی پہلی ٹیسٹ سینچری کیساتھ 120 رنز بنانے میں کامیاب رہے۔ اپنی اس کامیابی پر وہ خود بھی دم بخود تھے۔ اس حوالے سے ان کا کہنا تھا کہ میں سینچری کا جشن منانے کے بعد بھی میں خود کو چٹکی بھر رہا تھا کہ کہیں یہ خواب تو نہیں۔
ناٹنگھم ٹیسٹ
واضح رہے کہ ناٹنگھم (انگلینڈ) میں انگلینڈ اور ویسٹ انڈیز کے درمیان کھیلے جانے والے دوسرے ٹیسٹ کے دوسرے دن کھیل ختم ہونے تک ویسٹ انڈیز پہلی اننگ میں کیوم ہوج کی شاندار سینچری کے بدولت 5 وکٹوں کے نقصان پر 351 رنز بنانے میں کامیاب رہی۔
ناٹنگھم میں جاری سیریز کے دوسرے ٹیسٹ کے دوسرے دن ویسٹ انڈیز نے 5 وکٹوں کے نقصان پر 351 رنز بنایے جبکہ 65 رنز کا نقصان پورا کرنا ابھی باقی ہے۔
کیوم ہوج نمایاں رہے
ویسٹ انڈیز کی جانب سے کیوم ہوج 120 رنز بنا کر نمایاں رہے۔ ایلک ایتھانزے 82، کپتان کریگ بریتھ ویٹ 48، میکائل لوئس 21 اور کرک مکینزی 11 رنز بنا کر آؤٹ ہوئے۔
دوسرے دن کا کھیل ختم ہونے تک جیسن ہولڈر اور جوشوا ڈا سلوا 23 اور 32 رنز بالترتیب کے ساتھ کریز پر موجود تھے۔ انگلینڈ کی جانب سے شعیب بشیر نے 2 جبکہ کرس ووکس، گس ایٹکنسن اور بین اسٹوکس نے 1، 1 کھلاڑی کو آؤٹ کیا۔
