نیب نے ڈی جی اینٹی کرپشن پنجاب سہیل ظفر چٹھہ کے خلاف ریفرنس بند کرنے کا فیصلہ کیا ہے۔
نیب نے رائے اعجاز اور کامران ممتاز کے خلاف بھی ریفرنسز بند کرنے کا فیصلہ کیا ہے۔
یہ بھی پڑھیں: نیب: میگا کرپشن کے 179 مقدمات میں سے نصف بند یا ختم، کون کون فیضیاب ہوا؟
اس حوالے سے نیب نے لاہور کی احتساب عدالت میں باقاعدہ درخواست جمع کرا دی ہے۔ درخواست میں مؤقف اپنایا گیا ہے کہ سہیل ظفر چٹھہ، رائے اعجاز اور کامران ممتاز نے اپنے خلاف ریفرنسز واپس لینے کے لیے چئیرمین نیب کو درخواست دی تھی۔
نیب نے اپنی درخواست میں کہا کہ ملزمان کی درخواستوں کا بغور جائزہ لیا گیا، ڈی جی اینٹی کرپشن سہیل ظفر چٹھہ سمیت دیگر ملزمان کے خلاف شواہد موجود نہیں۔
یہ بھی پڑھیں: نیب ترامیم کیس: چیف جسٹس مجھ سے متعلق کیس کی سماعت نہ کریں، عمران خان
درخواست میں کہا گیا کہ ملزمان کے خلاف ریفرنسز چلانا مناسب نہیں ہوگا۔ نیب نے استدعا کی کہ احتساب عدالت ریفرنس واپس لینے کی نیب کی درخواست منظور کرلے۔
واضح رہے کہ سہیل ظفر چٹھہ سمیت دیگر کے خلاف نیب نے گجرات پولیس فنڈز میں کرپشن اور اختیارات کے ناجائز استعمال کا ریفرنس دائر کیا تھا۔
