وزیرِاعظم شہبازشریف کے کوآرڈینیٹر برائے ہیلتھ ڈاکٹر مختار احمد بھرتھ نے کہا ہے کہ ملک بھر میں 12 سال سے زائد عمر کی آبادی کی سکریننگ کی جائے گی اور ہیپاٹائٹس سی کے مریضوں کا مفت علاج ہوگا۔ وزیراعظم کا ہیپا ٹائیٹس سی کے خاتمے کے پروگرام کا جلد آغاز کیا جا رہا ہے۔ 68 ارب روپے کا پی سی ون بھی منظور ہوچکا ہے۔
ترجمان وزارت صحت کے مطابق ڈاکٹر مختار احمد بھرتھ نے کہا کہ پاکستان میں ہیپاٹائیٹس سی کے مریضوں کی تعداد میں بہت تیزی سے اضافہ ہو رہا ہے۔ پوری دنیا میں ہیپاٹائیٹس سی کے 6 کروڑ کیسز موجود ہیں جن میں سے ایک کروڑ ہیپاٹائیٹس کے کیسز پاکستان میں پائے جاتے ہیں۔ ہیپا ٹائیٹس کے خاتمے کا پروگرام وفاق اور چاروں صوبائی حکومتوں کے اشتراک سے شروع کیا جارہا ہے۔ آزاد جموں کشمیر اور گلگت بلتستان کے عوام بھی علاج کی سہولت سے مستفید ہوں گے۔
مزید پڑھیں:’ہیپاٹائٹس ’سی‘: پاکستان کا دنیا میں دوسرا نمبر
ڈاکٹر مختار احمد کا کہنا تھا کہ ہیپاٹائیٹس سی کے خاتمہ کو یقینی بنانے کے لیے وزیراعظم، نیشنل ٹاسک فورس کی سربراہی کریں گے۔ وفاقی حکومت پروگرام پر عمل درآمد کے لیے پراجیکٹ مینجمنٹ یونٹ بنائے گی۔
ان کا کہنا تھا کہ متعدی اور غیر متعدی امراض کی روک تھام کے لیے ایک مربوط حکمت عملی تشکیل دی ہے۔ موجودہ حکومت صحت کے شعبے پر خصوصی توجہ دے رہی ہے، صحت کے شعبے میں پڑے پیمانے پر اصلاحات کا سلسلہ جاری ہے۔