’روک سکو تو روک لو‘، ون ویلنگ کرتے نوجوان کا اسلام آباد پولیس کو چیلنج، ویڈیو وائرل

موٹر سائیکلوں پر ون ویلنگ کا خطرناک کرتب اب باقاعدہ ایک فن سمجھا جاتا ہے جس میں نوجوان مصروف سڑکوں پر موٹر سائیکلوں کے ایک ٹائر کو ہوا میں لہراتے ہوئے دوڑاتے ہیں۔

ون ویلنگ کے کھیل میں نوجوان تھرل اور ایڈونچر کے ساتھ ساتھ جوا بھی لگاتے ہیں جس میں بہترین ون ویلنگ کرنے والے کو انعام کے طور پر بڑی رقم دی جاتی ہے۔

ایسی ہی ون ویلنگ کرتے ہوئے ایک ویڈیو سوشل میڈیا پر وائرل ہو رہی ہے جس میں ایک نوجوان کو اسلام آباد کی سڑکوں پر ون ویلنگ کرتے دیکھا جا سکتا ہے۔

ایک پولیس اہلکار ون ویلنگ کرتے ہوئے نوجوان کا موٹر سائیکل پر پیچھا کرتا ہے جس پر نوجوان پاؤں سے اس پولیس اہلکار کی موٹر سائیکل کو مارتا ہوا تیزی سے آگے بڑھ جاتا ہے جس پر صارفین کی جانب سے شدید غصے کا اظہار کیا جا رہا ہے۔

ایک صارف نے لکھا کہ ویلرز گروپ اسلام آباد کی مثالی پولیس کو چیلنج دے رہا ہے اور آپ پولیس کی بے بسی دیکھیں کہ وہ نوجوان کو پکڑنے سے قاصر ہے، ساتھ ہی انہوں نے طنزاً لکھا کہ ’روک سکو تو روک لو‘۔

روک سکو تو روک لو ۔۔ویلرز گروپ کا اسلام آباد کی مثالی پولیس کو چیلنج ۔۔ زیر نظر ویڈیو میں پولیس کی بے بسی کا نظارہ کریں۔۔ pic.twitter.com/66J6EtH0Kr

— Zaman Mughal (@ZamanMu02130704) July 24, 2024

عالیہ عباس نے اسلام آباد پولیس کو نشانہ بناتے ہوئے لکھا کہ اس ویڈیو کو دیکھ کر اندازہ لگا لیں کہ یہ کتنی پروفیشنل پولیس ہے۔ یہ صرف معصوم لوگوں پہ چڑھائی کرنے والی کرمنل فورس ہے۔ جدھر آئین و قانون کی بات آ جائے ادھر ان کے دماغ جواب دے جاتے ہیں۔

اس سے اندازہ لگائیں یہ کتنی پروفیشنل پولیس ہے۔ معصوم لوگوں پہ چڑھائی کرنیوالی کرمنل فورس ہے۔
جدھر آئین و قانون اجائے ادھر انکے دماغ جواب دے جاتے ہیں https://t.co/gbxbprKARG

— Aliya Abbas. (@AliyaAbbas20) July 25, 2024

پی ٹی آئی کے حامی ایک صارف نے کہا کہ اسلام آباد پولیس کا سارا زور صرف پی ٹی آئی کے احتجاجی کارکنان کو پکڑنے پر چلتا ہے دوسرے لوگوں کو یہ کچھ نہیں کہتے۔